ព័ត៌មានជាតិ

កប៉ាល់ទេសចរណ៍ធុនយក្ស ១ គ្រឿង នាំភ្ញៀវជិត ១ ពាន់នាក់ ចូលចតនៅកំពង់ផែក្រុងព្រះសីហនុ

បានផុស

២ years មុន

នៅ

ថ្ងៃសៅរ៍ ១៤ មករា ២០២៣

ដោយ

កប៉ាល់ទេសចរណ៍ធុនយក្ស ១ គ្រឿង បានចូលចតរយៈពេល ១ ថ្ងៃ នៅកំពង់ផែស្វយ័តអន្តរជាតិក្រុងព្រះសីហនុ ដោយការចូលចតនេះបាននាំភ្ញៀវទេសចរបរទេស និងនាវិកសរុបជិត ១ ពាន់នាក់ ដើម្បីធ្វើទេសចរនៅតាមតំបន់រមណីយដ្ឋាន និងទីប្រជុំជនសំខាន់ៗ ក្នុងខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីនគរបាលអន្តោប្រវេសន្តច្រកទ្វារកំពង់ផែក្រុងព្រះសីហនុ បាននិយាយថា កប៉ាល់ទេសចរណ៍នេះឈ្មោះ SEABOURN ENCORE សញ្ជាតិ Bahamas មានបណ្ដោយប្រវែង ២១០ ម៉ែត្រ ទទឹង ២៨ ម៉ែត្រ និងជម្រៅទឹក ៦,៧០ ម៉ែត្រ ផ្ទុកភ្ញៀវទេសចរចម្រុះជាតិសាសន៍ចំនួន ៤២៩ នាក់ និងនាវិកចំនួន ៤៣០ នាក់។

មន្ត្រីដដែលបានឲ្យដឹងទៀតថា កប៉ាល់នេះបានធ្វើដំណើរមកពីប្រទេសថៃ ចូលចតនៅព្រឹកថ្ងៃទី ១៤ ខែមករា ឆ្នាំ ២០២៣។ បន្ទាប់មក នឹងចាកចេញទៅប្រទេសវៀតណាម នៅយប់ថ្ងៃដដែលនេះ។

នៅលើកប៉ាល់នេះ ភ្ញៀវទេសចរមានសញ្ជាតិច្រើនជាងគេ មានជនជាតិអាមេរិក ២៥០ នាក់ អង់គ្លេស ៥០ នាក់ និង អូស្ត្រាលី ៥៤ នាក់។

សូមបញ្ជាក់ថា នេះជាលើកទី ៣ ហើយ ដែលកប៉ាល់ទេសចរណ៍ធុនយក្សចូលចតកំពង់ផែស្វយ័តក្រុងព្រះសីហនុ ដឹកភ្ញៀវទេសចរចម្រុះជាតិសាសន៍ មកទស្សនាប្រទេសកម្ពុជា ក្រោយខកខានមួយរយៈដោយសារវិបត្តិជំងឺកូវីដ-១៩៕

អត្ថបទ ៖ ស៊ុយ ចាន់ធា