​បច្ចុប្បន្ន ក្រុមហ៊ុនជប៉ុនជាង២៥០ កំពុងវិនិយោគនៅកម្ពុជា

សព្វថ្ងៃនេះ ក្រុមហ៊ុនជប៉ុនចំនួនប្រមាណ ២៥៦ ដែលជាសមាជិកសមាគមធុរកិច្ចជប៉ុនប្រចាំនៅកម្ពុជា(JBAC) កំពុងវិនិយោគនៅក្នុងប្រទេសកម្ពុជានៅលើវិស័យផ្សេងៗគ្នា។ នេះបើតាមការបង្ហាញឲ្យដឹងរបស់លោក Yogo Kanda ប្រធានសមាគមធុរកិច្ចជប៉ុនប្រចាំនៅកម្ពុជា(JBAC)នៅក្នុងកិច្ចសម្ភាសពិសេសជាមួយសារព័ត៌មាន«កម្ពុជាថ្មី»កាលពីថ្ងៃទី១៨ ខែមករា ឆ្នាំ២០២៣។

សមាគមធុរកិច្ចជប៉ុនប្រចាំនៅកម្ពុជា(JBAC) គឺជាសមាគមមួយដែលប្រមូលម្តុំក្រុមហ៊ុនជប៉ុន ដែលវិនិយោគនៅប្រទេសផ្សេង ក្រៅពីប្រទេសកំណើតខ្លួន។ នៅពេលនេះ សមាគមធុរកិច្ចជប៉ុនប្រចាំនៅកម្ពុជា(JBAC)មានសមាជិកទាំង ២៥៦ បែងចែកជា ៧ដេប៉ាតឺម៉ង់។ ក្នុង១ឆ្នាំៗ មានការប្រមូលផ្តុំក្រុមហ៊ុនទាំងអស់មកប្រជុំ ចែករំលែកបទពិសោធគ្នាទៅវិញទៅមក ៤លើក សម្រាប់មុខជំនួញរកស៊ី ព្រមទាំងរបៀបរស់នៅក្នុ្ងងប្រទេសកម្ពុជា។

កាលពីឆ្នាំ២០១៥ JBAC បានបង្កើតឱ្យមានគណៈកម្មការចំនួន៧ ដើម្បីសម្របសម្រួលលើ ៤វិស័យគឺ វិស័យវិនិយោគ វិស័យឡូន វិស័យភស្តុភារ (Logistics) និងវិស័យការបង់ពន្ធ (Taxation)។ ក្នុងនោះ ក៏មានការជួបប្រជុំលើបញ្ហាផ្សេងៗរវាងវិស័យឯកជន និងរដ្ឋ ប្រសិនជាមានបញ្ហាណាមួយដែលក្រុមហ៊ុនជប៉ុនជួបប្រទះ នោះនឹងមានការដាក់ស្នើទៅរដ្ឋាភិបាកកម្ពុជា ដោះស្រាយជូនក្រុមហ៊ុនដែលជួបបញ្ហា។ នេះបើតាមការបញ្ជារបស់លោក Yogo Kanda។​

លោក Yogo Kanda បញ្ជាក់បន្ថែមថា សម្រាប់ជនជាតិជប៉ុនមកវិនិយោគនៅកម្ពុជាមួយចំនួន គឺមិនបានចូលជាសមាជិករបស់ JBAC ទេ ព្រោះភាគច្រើនពួកគេបើកអាជីវកម្មតូចៗបែបលក្ខណៈឯកជនដោយខ្លួនឯង រីឯក្រុមហ៊ុនខ្លះទៀតនៅជាយដែន ជាហេតុធ្វើឱ្យពួកគេពិបាកសម្រាប់ចូលកិច្ចប្រជុំម្តងៗ។ ដូច្នេះ ចំនួនក្រុមហ៊ុនជាសមាជិកខាងលើ គឺសុទ្ធតែជាក្រុមហ៊ុនៗដែលវិនិយោគនៅកម្ពុជា។

សមាគមធុរកិច្ចជប៉ុនប្រចាំនៅកម្ពុជា(JBAC) ត្រូវបានបង្កើតឡើងតាំងពីឆ្នាំ ១៩៩២ ដែលមុនដំបូងមានតែ ១០ក្រុមហ៊ុនប៉ុណ្ណោះជាសមាជិក។ ក្រោយពីកម្ពុជាមានការអភិវឌ្ឍ និងសន្តិភាពរហូតមកដល់សព្វថ្ងៃនេះ ក៏មានក្រុមហ៊ុនជប៉ុន ធ្វើការវិនិយោគ នៅកម្ពុជា ជាបន្តបន្ទាប់គួរឱ្យកត់សម្គាល់។ សមាគមនេះ ក៏ត្រូវបានបង្កើតឡើងដើម្បីឱ្យមានការអភិវឌ្ឍលើផ្នែកពាណិជ្ជកម្ម ឧស្សាហកម្ម ពីសំណាក់ជប៉ុនវិនិយោគនៅកម្ពុជា ដើម្បីឱ្យប្រទេសទាំងពីរ កាន់តែមានមេត្រីភាព និងកិច្ចសហប្រតិបត្តិការល្អថែមទៀយ៕

ដោយ៖ អុន ស្រីមាន