សម្ដេចតេជោ ៖ ថ្ងៃទី ២៥ មករា ២០២៣ ជាថ្ងៃដែលត្រូវធ្វើយុទ្ធនាការរាប់ថយក្រោយ ១០០ថ្ងៃ នៃស៊ីហ្គេម

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានរំលឹកថា នៅថ្ងៃខានស្អែក ពោលគឺនៅថ្ងៃទី ២៥ ខែមករា ឆ្នាំ ២០២៣ គឺជាថ្ងៃដែលត្រូវធ្វើយុទ្ធនាការរាប់ថយក្រោយ នៃព្រឹត្តិការណ៍ស៊ីហ្គេមលើកទី ៣២។  

សម្តេចតេជោ ហ៊ុន សែន បានថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា (CUS) ជិត ៧ពាន់នាក់ នាព្រឹកថ្ងៃទី ២៣ ខែមករានេះថា នៅថ្ងៃទី ២៥ ខែមករា ឆ្នាំ ២០២៣ខាងមុខនេះ គឺជាថ្ងៃនៃយុទ្ធនាការរាប់ថយក្រោយ ១០០ថ្ងៃ នៃព្រឹត្តិការណ៍ស៊ីហ្គេមលើកទី ៣២ ដែលប្រទេសកម្ពុជា ធ្វើជាម្ចាស់ផ្ទះ។

សម្ដេចតេជោ ហ៊ុន សែន បានថ្លែងបន្តថា «សូមកុំភ្លេចថា ថ្ងៃទី ២៥ ខែមករា ថ្ងៃខានស្អែក គឺជាថ្ងៃដែលយើងត្រូវធ្វើយុទ្ធនាការរាប់ថយក្រោយ ១០០ថ្ងៃ នៃស៊ីហ្គេម សូមកុំភ្លេច! ពេលធ្វើឲ្យផ្ទុះនៅទូទាំងប្រទេសឡើង»។

សម្ដេចតេជោ ហ៊ុន សែន បានលើកឡើងថា ប្រទេសកម្ពុជា ត្រូវរង់ចាំរហូតដល់ ៦០ឆ្នាំ ដើម្បីអាចធ្វើជាម្ចាស់ផ្ទះ នៃការរៀបចំព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ ស៊ីហ្គេម ពីព្រោះម្ខាងដោយសារស​ភាព​ការណ៍ប្រទេសជាតិ មិនអំណោយផង និងម្ខាងទៀតដោយសារខ្វះហេដ្ឋារចនាសម្ព័ន្ធ សម្រាប់បម្រើឲ្យការរៀបចំ។ តែឆ្នាំ ២០២៣នេះ​ ប្រទេសកម្ពុជា មានឱកាសក្នុងការរៀបចំព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ ស៊ីហ្គេម​លើកទី ៣២នេះ៕