កម្ពុជា ត្រៀមថវិកាជាង ១០០លានដុល្លារសម្រាប់​​ធ្វើជាម្ចាស់ផ្ទះ​កីឡាស៊ីហ្គេម

សម្តេចតេជោ ហ៊ុន សែន នាយករដ្ឋមន្រ្តីបានឱ្យដឹងថា កម្ពុជា បានត្រៀមថវិកាសម្រាប់រៀបចំព្រឹត្តិការណ៍កីឡាថ្នាក់តំបន់​អាស៊ីអាគ្នេយ៍ ស៊ីហ្គេម​លើកទី ៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។

សម្តេចថ្លែងដូច្នេះថា«ពីមុនខ្ញុំនិយាយថា​ យើងត្រៀមតែថវិកា ៤០លានដុល្លារទេ ក្នុងមួយឆ្នាំ ដោយយើងបង្កកបីឆ្នាំ ឥឡូវថវិកាសម្រាប់បម្រើការប្រកួត និងការកសាងនានា ឡើងជាង ១០០លានដុល្លារ»។

កម្ពុជា នឹងធ្វើជាម្ចាស់ផ្ទះលើកដំបូង នៃការប្រកួតកីឡាអាស៊ីអាគ្នេយ៍ ឬស៊ីហ្គេមលើកទី៣២ និងអាស៊ានប៉ារ៉ាហ្គេម​លើកទី១២ នៅថ្ងៃទី០៥ ខែឧសភា ឆ្នាំ២០២៣។

បើតាមសម្តេចតេជោ នាយករដ្ឋមន្រ្តី នៅព្រឹកថ្ងៃទី ២៣ មករានេះ បានរំលឹកជាថ្មីឱ្យមានការចូលរួមព្រឹត្តិការណ៍​រាប់ថយក្រោយ​១០០ថ្ងៃឈានទៅប្រារព្ធព្រឹត្តិការណ៍ស៊ីហ្គេមនៅកម្ពុជា។ ព្រឹត្តិការណ៍រាប់ថយក្រោយនេះ នឹងចាប់ផ្តើមធ្វើឡើងនៅថ្ងៃទី២៥ ខែមករា ដោយសម្តេចតេជោ បានអំពាវនាវឱ្យមានការរៀបចំយុទ្ធនាការ​រាប់ថយក្រោយនេះ ជាលក្ខណៈទ្រង់ទ្រាយធំផងដែរ៕