ព័ត៌មានជាតិ

អភិបាលខេត្តព្រះសីហនុ អញ្ជើញចូលរួមបើកបវេសនកាលឆ្នាំសិក្សាថ្មី២០២០-២០២១

បានផុស

៤ years មុន

នៅ

ថ្ងៃចន្ទ ១១ មករា ២០២១

ដោយ

លោក គួច ចំរើន អភិបាលខេត្តព្រះសីហនុ នៅព្រឹកថ្ងៃទី១១ ខែមករា ឆ្នាំ២០២១ បានអញ្ជើញចូលរួមធ្វើពិធីបើកបវេសនការឆ្នាំសិក្សា២០២០-២០២១ នៅសាលាវិទ្យាល័យ ហ៊ុនសែន មិត្តភាព ដែលមានទីតាំងស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះ ដែលមានការចូលរួមពីលោកស្រី ប្រធានមន្ទីរអប់រំយុវជន និងកីឡាខេត្តព្រះ សីហនុ ព្រមទាំង ប្រធាន អនុប្រធានមន្ទីរ អង្គភាពជុំវិញខេត្ត លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។ ថ្លែងក្នុងឱកាសចាប់ផ្តើមកម្មពិធីនេះដែល លោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុ បានលើកឡើងថា ប្រព័ន្ធវិស័យអប់រំនៅខេត្តព្រះសីហនុ ដើរលើផ្លូវមួយប្រកបដោយមោទនភាព និងបង្កឱកាសឲ្យកុមារទទួលបានការសិក្សាក្រោមម្លប់សន្តិភាព ដែលមានសម្តេចអគ្គមមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានបញ្ញាញាណឈ្លាសវៃលើកកម្ពស់គុណភាពអប់រំ ដើម្បីឆ្លើយតបទៅ នឹងគោលដៅអភិវឌ្ឍប្រកបដោយ ចីរភាព២០១៦-២០៣០ ចូលរួមអភិវឌ្ឍប្រទេសជាតិ។

លោកស្រីប្រធានមន្ទីរអប់រំបានឲ្យដឹងថា សាលារៀននៅខេត្តព្រះសីហនុ មានចំនួន ១០១សាលា ក្នុងនោះមត្តេយ្យដាច់ដោយឡែកមាន ០១សាលា បឋមសិក្សាចំនួន ៧២ អនុវិទ្យាល័យ១៨ វិទ្យាល័យ ០៩ សាលាគរុកោសល្យ និងវិក្រិតការ ០១កន្លែង។

លោក គួច ចំរើន អភិបាលខេត្តព្រះសីហនុ មានប្រសាសន៍ អបអរសាទរការបើកបវេសនកាលឆ្នាំសិក្សាថ្មី២០២០- ២០២១ ព្រមទាំងបានអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា ក្នុងឱកាសបើកបវេសនកាលថ្ងៃទី១១ ខែមករា ឆ្នាំ២០២១ ដែលជាថ្ងៃបើកទំព័រថ្មីនៃការចាប់ផ្ដើមជីវិតសិក្សាដំបូងរបស់ក្មួយៗដែលទើបដល់អាយុត្រូវចូលសាលារៀន និងជាថ្ងៃត្រឡប់មកកាន់សាលារៀនវិញ ក្នុងឆ្នាំសិក្សាថ្មីបន្ទាប់ពីបានឆ្លងកាត់ និងទទួលបទពិសោធន៍នៃការអប់រំក្នុងសម័យ Covid- ១៩ ក្នុងឆ្នាំសិក្សា២០១៩- ២០២០កន្លងមក ថ្វីត្បិតឆ្នាំនេះព្រះរាជាណាចក្រកម្ពុជា ក៏ដូចជាពិភពលោកកំពុងតែប្រយុទ្ធប្រឆាំងនឹងជំងឺកូវីដ-១៩ ដែលមិនទាន់មានភាពច្បាស់លាស់ពាក់ព័ន្ធនឹងជំងឺ កូវីដ-១៩យ៉ាងណាក៏ដោយ ក៏រាជរដ្ឋាភិបាលកម្ពុជា នៅតែប្រារព្ធពិធីបើកបវេសនកាលឆ្នាំសិក្សាថ្មី ២០២០-២០២១ ក្រោមទស្សន ទានថ្មីនៃគន្លងជីវិតថ្មីក្នុងវិស័យអប់រំនៅកម្ពុជា។

លោកអភិបាលខេត្តព្រះសីហនុ មានប្រសាសន៍ទៀតថា ក្នុងកាលៈទេសៈបច្ចុប្បន្ននេះ យើងត្រូវស្ថិតនៅក្នុងគន្លងថ្មីដោយរក្សាគម្លាត ការលាងសម្អាតដៃ ការវាស់កម្ដៅ នៅតែបន្តអនុវត្ត ថ្វីត្បិតតែការបើកបវេសនកាលឆ្នាំសិក្សាថ្មីនេះ មិនអាចជួបជុំគ្នាក្នុងទ្រង់ទ្រាយធំយ៉ាង ណាក៏ដោយ សម្រាប់ខេត្តព្រះសីហនុ បានបើកបវេសនកាលឆ្នាំសិក្សាថ្មីនៅតាមគ្រឹះស្ថានសិក្សាចំនួន ៩៥កន្លែង។ ហើយយើងមានបទពិសោធន៍ ក្នុងការគ្រប់គ្រងការបង្រៀន នៅក្នុងសហគមន៍នាឆ្នាំកន្លងមក ដែលក្រសួងអប់រំបានច្នៃប្រឌិតបង្រៀនច្រើនរបៀបតាមបណ្ដាញឌីជីថល តាមទូរទស្សន៍ ក៏ប៉ុន្តែមិនអាចឲ្យសិស្សរៀនបានគ្រប់គ្នានៅទូទាំងខេត្ត ដោយសារពួកគាត់ខ្វះស្មាតហ្វូន និងកន្លែងមួយចំនួនមិនមានសេវា Internet ។ កន្លងមកលោកគ្រូ អ្នកគ្រូរបស់យើងបានខិតខំចុះទៅតាមគោល ដៅក្នុងសហគមន៍ ដើម្បីផ្តល់ឱកាសឲ្យសិស្សបានសិក្សាតាមរយៈការលើកទឹកចិត្តពីលោកគ្រូ អ្នកគ្រូនៅគ្រប់កម្រិតសិក្សា ម្យ៉ាងទៀតដោយមានការចូលរួមពីមាតា បិតា ជំរុញកូន-ចៅចូលរួមសិក្សាតាមប្រពន្ធអនឡាញ ហើយយើងជម្នះបានជាបន្តបន្ទាប់ ។ ថ្វីត្បិតតែយើងត្រូវរក្សាគម្លាត ដែលតម្រូវសាលាមួយចំនួនត្រូវចែកវេនសិក្សា និងធ្វើស្វ័យសិក្សាតាមប្រពន្ធអនឡាញ ឬតាមប្រពន្ធឌីជីធល ដើម្បីអភិវឌ្ឍន៍សមត្ថមភាពប្រកបដោយគុណវុធ។ មន្ទីរអប់រំត្រូវរៀបចំផែនការ សកម្មភាពនៃការប្រែប្រួលដោយសារកូវីដ-១៩ ហើយថ្ងៃនេះជាការចាប់ផ្ដើមបើកបវេសនកាលឆ្នាំសិក្សាថ្មីតាមបរិបទថ្មី ដោយបង្កើនសមត្ថភាពលោកគ្រូ អ្នកគ្រូ និងសិស្សានុសិស្សសម្រាប់អនាគតប្រទេសជាតិ។

ឆ្លៀតក្នុងឱកាសនេះដែរ លោក គួច ចំរើន បានផ្តាំផ្ញើដល់ក្មួយៗសិស្សានុសិស្ស ត្រូវខិតខំសិក្សារៀនសូត្រចែករំលែក ផ្តល់អត្ថប្រយោជន៍ និងទទួលបាននូវចំណេះដឹងពីលោកគ្រូ អ្នកគ្រូ ដើម្បីយើងមានធនធាន ក្នុងការចូលរួមកសាង និងអភិវឌ្ឍន៍ប្រទេសជាតិ មានសុខសន្តិភាព មានការអភិវឌ្ឍមូលដ្ឋានសម្រាប់ប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិមកលេងកម្សាន្ត ម្យ៉ាងទៀត យើងក៏ត្រូវអភិវឌ្ឍន៍ក្រុងរបស់យើងប្រកបដោយផាសុកភាពនិងមានការរីកចម្រើន ថែមទៀត៕

អត្ថបទ៖ ស៊ុយ ចាន់ធា