លោកស្រី សៀង ចាន់ហេង បានប្រគល់ដីវិវាទទំហំជាង ៥០ហិកតា ជូនលោកជំទាវ ហ៊ុន ប៊ុនធឿន និងលោកស្រី ហៀវ លន់ ហើយ

ក្រោមការចូលរួមពីមន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ គឺលោកស្រី សៀង ចាន់ហេង ម្ចាស់​ក្រុមហ៊ុន ​ហេង អភិវឌ្ឍន៍​ បានទទួលស្គាល់ និងប្រគល់ដីវិវាទទំហំជាង ៥០ហិកតា ជូនលោកជំទាវ ហ៊ុន ប៊ុនធឿន និងលោកស្រី ហៀវ លន់ ហើយ។ នេះបើយោងតាមកិច្ចព្រមព្រៀងបញ្ចប់វិវាទដីធ្លីរវាងលោកស្រី សៀង ចាន់ហេង ជាមួយលោកជំទាវ ហ៊ុន ប៊ុនធឿន និងលោកស្រី ហៀវ លន់ លើករណីដីស្ថិតនៅចំណុចចន្លោះទំនប់ ៩៤-៩៦ និងចន្លោះខ្សែស្រប ៥៤-៥៦-៥៧ ក្នុងភូមិសាស្ត ភូមិទួលសាលា ឃុំស្អាងភ្នំ ស្រុកស្អាង ខេត្តកណ្តាល។

ក្នុងកិច្ចព្រមព្រៀងនោះ បានឲ្យដឹងថា កាលពីថ្ងៃទី ២៣ ខែមករា ឆ្នាំ ២០២៣ នៅទីស្តីការក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំដោះស្រាយបញ្ចប់វិវាទដីធ្លីរវាងលោកស្រី សៀង ចាន់ហេង ជាមួយលោកជំទាវ ហ៊ុន ប៊ុនធឿន និងលោកស្រី ហៀវ លន់ ស្ថិតនៅចំណុចចន្លោះទំនប់ ៩៤-៩៦ និងចន្លោះខ្សែស្រប ៥៤-៥៦-៥៧ ក្នុងភូមិសាស្ត្រភូមិទួលសាលា ឃុំស្អាងភ្នំ ស្រុកស្អាង ខេត្តកណ្តាល។

កិច្ចប្រជុំរកដំណោះស្រាយនេះ មានការចូលរួមពីលោក ឡោ ដាវុធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់, លោក សេង ឡូត អគ្គនាយករដ្ឋបាល, លោក សួន សូផា អគ្គនាយកសុរិយោដី និងភូមិសាស្ត, លោក សេង សុវណ្ណរ័ត្ននា អគ្គនាយករងរដ្ឋបាល, លោកជំទាវ ហ៊ុន ប៊ុនធឿន, លោកស្រី ហៀវ លន់, លោកស្រី សៀង ចាន់ហេង និងអ្នកចូលរួមដូចមាន ក្នុងបញ្ជីវត្តមានភ្ជាប់មកជាមួយ។

ជាលទ្ធផល ភាគីវិវាទបានឯកភាពគ្នាដូចខាងក្រោម ៖ ១. លោកស្រី សៀង ចាន់ហេង ទទួលស្គាល់និងប្រគល់ដីវិវាទទំហំ ៥០ ហិកតា ០៨ អា ស្ថិតនៅភូមិ ទួលសាលា ឃុំស្អាងភ្នំ ស្រុកស្អាង ខេត្តកណ្តាល ដូចមានផែនទីបង្ហាញទីតាំងដីភ្ជាប់ជាឧបសម្ព័ន្ធកិច្ចព្រមព្រៀងនេះ ជូនលោកជំទាវ ហ៊ុន ប៊ុនធឿន និងលោកស្រី ហៀវ លន់។

២. លោកជំទាវ ហ៊ុន ប៊ុនធឿន និងលោកស្រី ហៀវ លន់ យល់ព្រមទទួលដីដែលប្រគល់ជូនខាងលើ។ ៣. ភាគីទាំងពីរ យល់ព្រមដកពាក្យបណ្តឹង ដែលបានដាក់នៅគ្រប់ស្ថាប័ន និងស្ថាប័នតុលាការ រួមទាំងសំណុំរឿងរក្សាការពារទាំងអស់យ៉ាងយូរ ២សប្ដាហ៍ គិតចាប់ពីថ្ងៃចុះកិច្ចព្រមព្រៀងនេះ៕