លោក ម៉ែន វិបុល ដាក់ចេញទិសដៅ៨ចំណុច​ដល់មន្រ្តី​ដើម្បីពង្រឹងការងារបន្ថែមទៀត

អភិបាលខេត្តស្វាយរៀង លោក ម៉ែន វិបុល បានដាក់ចេញនូវទិសដៅសំខាន់ៗ ចំនួន ៨ចំណុច ដល់កងកម្លាំង និងអាជ្ញាធរពាក់ព័ន្ធទាំងអស់ ដើម្បីពង្រឹងការងារឱ្យមានប្រសិទ្ធភាពក្នុងឆ្នាំ ២០២៣នេះ។ ការដាក់ចេញទិសដៅបន្ថែមទៀតនេះ ធ្វើឡើងនៅក្នុងកិច្ចប្រជុំបូកសរុបលទ្ធផលការងារប្រចាំខែមករា និងទិសដៅការងារខែកុម្ភៈ ឆ្នាំ២០២៣ នាថ្ងៃទី ២៦ មករានេះ។

ទិសដៅសំខាន់ៗមួយចំនួន៨ ចំណុច ដែលអភិបាលខេត្តស្វាយរៀង ដាក់ចេញនេះ រួមមាន៖

១- រដ្ឋបាលសាលាខេត្តត្រូវត្រៀមលក្ខណៈរៀបចំកម្មវិធីប្រជុំបូកសរុបលទ្ធផល​ការងារប្រចាំឆ្នាំ២០២២​របស់រដ្ឋបាលខេត្ត។

២-អាជ្ញាធរ ក្រុង-ស្រុក ត្រូវពង្រឹងការការនុវត្តការគ្រប់គ្រងដីរដ្ឋឱ្យមានប្រសិទ្ធភាព។

៣.  ត្រូវបន្តជំរុញប្រជាពលរដ្ឋ និងកម្មករ ដែលមិនទាន់បានចាក់វ៉ាក់សាំងឲ្យទៅចាក់វ៉ាក់សាំង ឲ្យបានគ្រប់ៗ គ្នា ជាពិសេសដូសទី៣ ដូសទី៤ ដូសទី៥ និងដូសទី៦។

៤.អាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តពង្រឹងការអនុវត្តភូមិ-ឃុំមានសុវត្ថិភាពឱ្យបានល្អក្នុងមូលដ្ឋានរបស់ខ្លួន។

៥.រដ្ឋបាលក្រុង-ស្រុក ត្រូវជម្រុញការរៀបចំផែនកាថវិកាឃុំសង្កាត់ឱ្យបានឆាប់រហ័ស។

៦.អាជ្ញាធរគ្រប់លំដាប់ថ្នាក់ ត្រូវពង្រឹងការទប់ស្កាត់ការជួញដូរចែកចាយ និងប្រើប្រាស់គ្រឿងញៀននៅតាមមូលដ្ឋាន។

៧.បន្តបង្កើនការផ្សព្វផ្សាយច្បាប់ចរាចរណ៍ផ្លូវគោក និងរឹតបន្តឹងការអនុវត្តច្បាប់ ជាពិសេសជំរុញការពាក់មួកសុវត្ថិភាព និងត្រួតពិនិត្យជាប្រចាំរថយន្តដឹកកម្មករ ដើម្បីបង្ការគ្រោះថ្នាក់។

៨.អាជ្ញាធរក្រុង ស្រុក ត្រូវពិនិត្យ និងខិតខំដោះស្រាយបញ្ហាទំនាស់នានារបស់បងប្អូនប្រជាពលរដ្ឋឱ្យអស់​ពីលទ្ធភាពនៅក្រៅប្រព័ន្ធតុលាការ។

ជាមួយនឹងការដាក់ចេញនូវទិសដៅនេះ លោក ម៉ែន វិបុល ក៏បានថ្លែងកោតសរសើរ និងអរគុណចំពោះកង​កម្លាំងប្រដាប់អាវុធទាំងបី អាជ្ញាធរពាក់ព័ន្ធទាំងអស់ដែលខិតខំចូលរួមការពារសន្តិសុខ​សណ្តាប់ធ្នាប់ជូនបង​ប្អូនប្រជាពលរដ្ឋនៅទូទាំងខេត្តបានល្អប្រសើរផងដែរ៕

ដោយ:ភក្ដី