រថយន្តដឹកលើសទម្ងន់៨គ្រឿង ត្រូវអាជ្ញាធរឃាត់ និងផាកពិន័យ​តាមផ្លូវច្បាប់

ព្រៃវែង ៖ នៅវេលាយប់រំលងអធ្រាត្រឈានចូលព្រឹកថ្ងៃទី២៧មករានេះ ក្រុមជញ្ជីងអចល័តរបស់ក្រសួងសាធារណការ និងដឹកជញ្ជូន សហការជាមួយកម្លាំងខេត្តព្រៃវែង បានឆ្មក់ចុះចាប់ឃាត់បានរថយន្តយីឌុបដឹកស្រូវចំនួន៨គ្រឿង ដឹកលើសទម្ងន់ ដែលច្បាប់បានអនុញ្ញាត និងបានហៅម្ចាស់រថយន្តចូលខ្លួនធ្វើការផាកពិន័យទៅតាមផ្លូវច្បាប់។

ការឆ្មក់ចុះចាប់ក្រុមរថយន្តល្មើសទាំងនេះ បានធ្វើឡើងចាប់ពីម៉ោង១២យប់ ថ្ងៃទី២៦មករា រហូតដល់ម៉ោង៤ទាប​ភ្លឺព្រឹកថ្ងៃទី២៧មករា នៅចំណុចទីប្រជុំជនអ្នកលឿង ស្ថិតក្នុងភូមិ៤ ឃុំព្រែកខ្សាយ(ខ) ស្រុកពាមរក៌ ខេត្តព្រៃវែង ដោយធ្វើការចាប់ឃាត់បានជាបន្តបន្ទាប់សរុបចំនួន៨គ្រឿង ក្នុងនោះរថយន្តប្រភេទវ៉េអងសណ្តោងរ៉ឺម៉កចំនួន៦គ្រឿង និងរថយន្តយីឌុបភ្លៅ៤ចំនួន២គ្រឿង។

មន្ត្រីជំនាញដែលចុះបង្ក្រាបផ្ទាល់នោះបានឱ្យដឹងថា តាមផ្លូវច្បាប់ រថយន្តវ៉េអងសណ្តោងរ៉ឺម៉ក គឺអនុញ្ញាតឱ្យផ្ទុក​ទម្ងន់ត្រឹម​៤០តោនប៉ុណ្ណោះ ចំណែករថយន្តយីឌុបភ្លៅ៤ គឺអនុញ្ញាតឱ្យផ្ទុកទម្ងន់សរុប៣០តោន ប៉ុន្តែពេលចាប់​ឃាត់និងថ្លឹងទម្ងន់ទៅបានរកឃើញថា រថយន្តវ៉េអងបានដឹកលើសទម្ងន់រហូតដល់ជិត២០តោន ហើយរថយន្តយី​ឌុបភ្លៅ៤ បានដឹកលើសរហូតដល់ជាង១០តោន ទើបមន្ត្រីជំនាញធ្វើការចាប់ឃាត់ ហើយតម្រូវឱ្យម្ចាស់រថយន្តចូល​ខ្លួនមកបង់ផាកពិន័យទៅតាមផ្លូវច្បាប់ដែលកំណត់ ក្នុង១តោនពិន័យ៣០ម៉ឺនរៀល ហើយបើដឹកលើសចាប់ពី២០​ភាគរយឡើង ផាកពិន័យជាទឹកប្រាក់ផង និងឃាត់រថយន្តទុករយៈពេល១ឆ្នាំទៀត។

ជាមួយគ្នានោះដែរ ក្រុមឈ្មួញដែលជាម្ចាស់រថយន្តម្ចាស់ស្រូវបានលើកឡើងថា ពួកគាត់ទទួលស្គាល់ថា បានដឹក​លើសទម្ងន់ ដែលច្បាប់បានកំណត់ពិតមែន និងព្រមទទួលបង់ផាកពិន័យផងដែរ ប៉ុន្តែពួកគាត់បាន​សំណូមពរទៅខាង​មន្ត្រីជំនាញស្នើសុំយកស្រូវទៅលក់នៅព្រំដែនសិន ព្រោះស្រូវដែលនៅលើរថយន្តសុទ្ធតែជាស្រូវសើមទើបច្រូតរួច បើទុកយូរនឹងខូចអស់។ ប៉ុន្តែសំណូមពរនេះមន្ត្រីជំនាញមិនយល់ព្រមនោះទេ ដោយតម្រូវឱ្យម្ចាស់ស្រូវ​រករថយន្តផ្សេងមកផ្ទេរជំនួសវិញ៕សៅគ្រី