លោកទេសរដ្ឋមន្រ្តី លី ធុជ លើកទឹកចិត្តជនមានពិការភាព​ដោយគ្រាប់មីន​បន្តពង្រឹងសមត្ថភាព និងចក្ខុវិស័យ

លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានលើកឡើងថា ការធ្លាក់ខ្លួនពិការដោយសារគ្រាប់មីន និងសំណល់ជាតិផ្ទុះពីសង្រ្គាម មិនមែនជាជម្រើសរបស់ប្រជាពលរដ្ឋទេ វាកើតចេញពីប្រវត្តិសាស្រ្តពិតនៃការបែក​បាត់សាមគ្គី និងជម្លោះផ្ទៃក្នុងរវាងខ្មែរនិងខ្មែរ ដែលនាំឲ្យមានសង្រ្គាមអូសបន្លាយអស់ជាងបីទសវត្សរ៍នៅកម្ពុជា។ ការរក្សាឲ្យបាននូវសន្តិភាព គឺជាគុណតម្លៃដែលនាំឲ្យប្រទេសជាតិមានរីកចំរើន ហើយជីវភាពរបស់ប្រជាពលរដ្ឋទាំងអស់​កាន់តែប្រសើរឡើង តាមរយៈការទទួលបាននូវឱកាសការងារ ប្រាក់ចំណូល និងការអភិវឌ្ឍនៅមូលដ្ឋាន។ លោកលើកឡើងបែបនេះ នៅក្នុងជំនួបសំណេះសំណាលជាមួយប្រជាពលរដ្ឋនៅសង្កាត់ប្រាសាទ និងនាំយកនូវ​អំណោយរបស់ សម្តេចតេជោ នាយករដ្ឋមន្រ្តី និងសម្តេចកិត្តិព្រឺទ្ធបណ្ឌិត ប្រធានកាកបាទក្រហមកម្ពុជា ប្រគល់​ជូនដល់ជនមានពិការភាពដោយសារគ្រាប់មីន និងសំណល់ជាតិផ្ទុះពីសង្រ្គាមជូនដល់សង្កាត់ទាំង ៥ ក្នុងក្រុងបាវិត នាថ្ងៃទី២៧ ខែមករា ឆ្នាំ២០២៣ ។

លោកបន្តទៀតថា ទោះបីធ្លាក់ខ្លួនពិការ ប៉ុន្តែមិនមែនពិការសមត្ថភាពទេ ត្រូវមានចក្ខុវិស័យក្នុងការចូលរួមដល់​ការអភិវឌ្ឍប្រទេស​ជាតិ អភិវឌ្ឍសង្គម និងគ្រួសារ។ រាជរដ្ឋាភិបាល ក្រោមការដឹកនាំរបស់ សម្តេចតេជោ នាយករដ្ឋមន្រ្តី តែងតែយកចិត្តទុកដាក់ចំពោះជីវភាពរស់នៅប្រចាំថ្ងៃរបស់ប្រជាពលរដ្ឋទូទាំងប្រទេស និងលើកកម្ពស់ដល់ជនមាន​ពិការភាព តាមរយៈការជម្រុញឲ្យគ្រប់ក្រសួង ស្ថាប័ន និងបណ្តាក្រុមហ៊ុននានា ផ្តល់អាទិភាពឲ្យចូលរួមបម្រើការងារ។

ក្នុងឱកាសនោះ លោកទេសរដ្ឋមន្រ្តី ក៏បានលើកឡើងអំពីតម្លៃនៃសន្លឹកឆ្នោតនាពេលខាងមុខ ដែលជាសន្លឹកឆ្នោត​គាំទ្រសន្តិភាព និងការអភិវឌ្ឍ ក្រោមការដឹកនាំរបស់សម្តេចតេជោ ហើយសន្លឹកឆ្នោតនេះ នឹងនាំមកនូវឱកាស​ការងារយ៉ាងច្រើនសន្ធឹកសន្ធាប់ និងប្រាក់ចំណូលសម្រាប់គ្រួសាររបស់យើងទាំងអស់គ្នា។ សូមបន្តគាំទ្រ​សម្តេចតេជោនាយករដ្ឋមន្រ្តី និងបោះឆ្នោតជូនគណបក្សប្រជាជនកម្ពុជា ដែលជាគណបក្សនាំមកនូវសន្តិភាព និងការអភិវឌ្ឍ៕ ដោយ:ភក្ដី