កម្មវិធី មួយជំហាន គ្មានផ្លាស្ទិក បានធ្វើឡើងនៅខេត្តបាត់ដំបង ដើម្បីពញ្ញាក់ស្មារតីពលរដ្ឋឲ្យស្រលាញ់​បរិស្ថាន

កាលពីព្រឹកថ្ងៃទី២៩ ខែមករា ឆ្នាំ២០២៣ ក្រុមការងារនៃកម្មវិធី មួយជំហាន គ្មានផ្លាស្ទិក បានចុះមកកាន់ខេត្តបាត់ដំបង ក្នុងគោលបំណងផ្សព្វផ្សាយអោយប្រជាពលរដ្ឋយល់កាន់តែច្បាស់អំពីបរិស្ថានល្អ នៅក្នុងខេត្ត ពិសេសគឺតាមតំបន់ដែលពួកគាត់រស់នៅ ព្រមទាំងបានចុះធ្វើចលនាជាក់ស្តែងនៅក្នុងក្រុងបាត់ដំបង និងនៅតាមទីប្រជុំជនមួយចំនួនផងដែរ។

ក្នុងកម្មវិធីនេះដែរ ក្រៅពីក្រុមការងារដែលចុះមកពីទីក្រុងភ្នំពេញ ក៏មានការអញ្ជើញចូលរួមពីសំណាក់មន្ត្រីនៃមន្ទីរបរិស្ថានខេត្ត មន្ត្រីរាជការ ប្រជាពលរដ្ឋ និងប្អូនៗសិស្សានុស្ស សរុបប្រមាណជាង ១.០០០ នាក់ ដែលបានចូលរួមក្នុងការប្រមូល និងរើសសម្រាម ពិសេសគឺកាកសំណល់ផ្លាស្ទិកតែម្តង។

នៅក្នុងកម្មវិធីដ៏សកម្មក្លៀវក្លានេះ គេសង្គេតឃើញថា ម្នាក់ៗមានទឹកមុខរីករាយ ព្រមទាំងបានចល័តទីទៅតាមបណ្តាចំណុចសំខាន់ៗ ដូចជានៅតាមទីផ្សារ និងស្ថានីយ៍រថភ្លើងជាដើម ៘ ដើម្បីបង្ហាញដល់មហាជនអោយយល់ច្បាស់ អំពីការថែទាំងបរិស្ថានអោយបានល្អគ្រប់ៗគ្នា និងលុបបំបាត់នូវកាកសំណល់ផ្លាស្ទិក ដែលអាចបំផ្លាញបរិស្ថាននៅក្នុងសង្គម ដូច្នេះត្រូវធ្វើយ៉ាងណាអោយសមទៅនឹងពាក្យមួយឃ្លាថា ( មួយជំហានន គ្មានផ្លាស្ទិក ) ។ ដោយកម្មវិធីនេះ ត្រូវបានបញ្ចប់នៅរសៀលថ្ងៃដដែល ដោយលទ្ធផលនៃការចុះអនុវត្ត សរុបគឺ ប្រមូលបានសម្រាមដែលជាកាកសំណល់ទូទៅ ប្រមាណ ៨២០ kg និងសម្រាមផ្លាស្ទិក ប្រមាណ ៣៥ kg ៕

អត្ថបទ៖ សោ និយមរ័ត្ន