សម្ដេចតេជោ ហ៊ុន សែន ណែនាំឲ្យរៀបចំស៊ីហ្គេម ប្រកបដោយការទទួលខុសត្រូវ និងសុវត្ថិភាព

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំដល់ក្រសួង-ស្ថាប័នពាក់ព័ន្ធ ត្រូវធ្វើយ៉ាងណាឲ្យប្រទេសកម្ពុជា ធ្វើជាម្ចាស់ផ្ទះស៊ីហ្គេមលើកទី ៣២ ប្រកបដោយការទទួលខុសត្រូវ និងសុវត្ថិភាព សម្រាប់អ្នកចូលរួមទាំងអស់។

សម្តេចតេជោ ហ៊ុន សែន បានថ្លែងក្នុងពិធីជួបសំណេះសំណាល និងផ្ដល់រង្វាន់លើកទឹកចិត្តដល់សិស្សជាប់និទ្ទេស A នាព្រឹកថ្ងៃទី ២ ខែកុម្ភៈនេះថា នៅសល់តែ ៩២ថ្ងៃទៀតប៉ុណ្ណោះ នឹងឈានដល់ព្រឹត្តិការណ៍ស៊ីហ្គេមលើកទី ៣២ ដែលប្រទេសកម្ពុជាធ្វើជាម្ចាស់ផ្ទះក្នុងឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងបែបនេះថា «យើងនៅសល់តែ ៩២ថ្ងៃទៀតទេ នឹងដល់ស៊ីហ្គេម​ហើយ ចឹងទេ ត្រូវធ្វើយ៉ាងម៉េចឲ្យប្រទេសរបស់យើង ធ្វើជាម្ចាស់ផ្ទះដោយមានការទទួលខុសត្រូវ សុវត្ថិភាព សម្រាប់កីឡាករ-កីឡាការនីរបស់យើងផង របស់ប្រទេសដែលមកចូលរួមប្រកួតផង និងអ្នកគាំទ្រទាំងឡាយ ក៏ត្រូវបានស្វាគមន៍នៅក្នុងទឹកដីព្រះរាជា ណាចក្រកម្ពុជា»៕