សម្ដេចតេជោ អំពាវនាវពលរដ្ឋខ្មែររស់នៅក្រៅប្រទេស មកលេងស្រុកក្នុងឱកាសចូលឆ្នាំខ្មែរ និងមើលការប្រកួតស៊ីហ្គេម

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ប្រជាពលរដ្ឋខ្មែររស់នៅក្រៅប្រទេស អញ្ជើញមកដើរលេងកម្សាន្ដនៅក្នុងប្រទេសកម្ពុជា ដើម្បីពិនិត្យមើលអំពីការរីកចម្រើនប្រទេសរបស់ខ្លួន។

នៅក្នុងពិធីជួបសំណេះសំណាល និងផ្ដល់រង្វាន់លើកទឹកចិត្តដល់សិស្សជាប់និទ្ទេស A នាព្រឹកថ្ងៃទី ២ ខែកុម្ភៈនេះ សម្ដេចតេជោ ហ៊ុន សែន​ បានអំពាវនាវដល់ប្រជាពលរដ្ឋខ្មែររស់នៅក្រៅប្រទេស មកដើរលេងកម្សាន្ដក្នុងប្រទេសកម្ពុជា ដើម្បីមកមើលឲ្យឃើញផ្ទាល់ភ្នែកនូវសមិទ្ធផល និងការរីកចម្រើននៃប្រទេសជាតិរបស់ខ្លួន។

សម្ដេចតេជោ ហ៊ុន សែន បានថ្លែងបន្តថា ប្រជាពលរដ្ឋខ្មែររស់នៅក្រៅប្រទេស​ អាចអញ្ជើញមកដើរលេងកម្សាន្ដក្នុងឱកាសពិធីចូលឆ្នាំខ្មែរ និងការចូលរួមទស្សនាការប្រកួតកីឡាស៊ីហ្គេម ដែលប្រទេសកម្ពុជា ធ្វើជាម្ចាស់ផ្ទះផងដែរ។

សម្ដេចតេជោ ហ៊ុន សែន បានថ្លែងបែបនេះថា «ខ្ញុំអំពាវនាវឲ្យបងប្អូនមកលេងស្រុក ព្រោះដើម្បីចៀសវាងនូវការចាញ់បោកណាមួយ នូវការឃោសនាអកុសលរបស់អ្នក ដែលគេចង់មួលបង្កាច់សភាពការណ៍​»៕