តើសម្ដេចតេជោ ហ៊ុន សែន ផ្ដល់អ្វីខ្លះជារង្វាន់ចំពោះសិស្សបាក់ឌុបជាប់និទ្ទេស A?

នៅព្រឹកថ្ងៃទី២ ខែកុម្ភៈ ឆ្នាំ២០២៣នេះ សម្តេចតេជោ ហ៊ុន សែន បានជួបសំណេះសំណាល និងផ្ដល់រង្វាន់លើកទឹកចិត្តដល់សិស្សជាប់និទ្ទេស A សរុបចំនួន ១ ០៥៦នាក់។ រង្វាន់ដែលសម្ដេចតេជោបានផ្ដល់ឲ្យសិស្សនិទ្ទេស A នាថ្ងៃនេះ រួមមាន៖ ប្រាក់ស្លឹង សៀវភៅក្រមង៉ុយ សៀវភៅបណ្ឌិត អ៊ូ ចុង រួមទាំង IPAD និងថវិកាចំនួន ២លានរៀល។

បើតាមសម្ដេចតេជោ ហ៊ុន សែន ប្រាក់ស្លឹង គឺជានិមិត្តរូបនៃការបោះពុម្ពផ្សាយរូបិយវត្ថុដំបូងរបស់កម្ពុជាដែលប្រាក់ស្លឹងនេះបានបោះពុម្ពនៅក្នុងឆ្នាំ១៥១៤។ សម្ដេចតេជោ បានថ្លែងថា ការផ្ដល់រង្វាន់ជាប្រាក់ស្លឹងនេះ គឺទុកជាវត្ថុអនុស្សាវរីយ៍រវាងសម្ដេច និងសិស្សដែលប្រឡងជាប់និទ្ទេស A ខណៈប្រាក់ស្លឹង ក៏ត្រូវបានជ្រើសជាវត្ថុអនុស្សាវរីយ៍សម្រាប់ផ្ដល់ជូនថ្នាក់ដឹកនាំ ក៏ដូចជាភ្ញៀវបរទេសដែលជួបជាមួយសម្ដេចផងដែរ។

ដោយឡែកការជ្រើសយកសៀវភៅក្រមង៉ុយ និងសៀវភៅបណ្ឌិត អ៊ូ ចុង ជារង្វាន់ចំពោះសិស្សនិទ្ទេស A នាពេលនេះ សម្ដេចតេជោ បញ្ជាក់ថា សៀវភៅទាំងពីរក្បាលនេះ គឺជាកំណប់ទ្រព្យដ៏មានតម្លៃដើម្បីជាច្បាប់ទូន្មានដ៏ល្អប្រពៃសម្រាប់ប្រជាជនខ្មែរក្នុងជីវភាពរស់នៅប្រចាំថ្ងៃ៕

ដោយ៖ ធឿន វ៉ាន់សុង