អ្នកនាំពាក្យ ៖ អាមេរិក ផ្ដល់ពាន​រង្វាន់អ្នកការពារសិទ្ធិមនុស្ស ដល់នរណាក៏ដោយមិនពាក់ព័ន្ធ ឬជះឥទ្ធិពលមកលើកម្ពុជាឡើយ

​មន្ត្រីនាំ​ពាក្យ​គណៈកម្មាធិការ​​សិទ្ធិមនុស្ស​កម្ពុជា បានលើកឡើងថា ក្រសួងការបរទេសអាមេរិក ផ្ដល់ពាន​រង្វាន់អ្នកការពារសិទ្ធិមនុស្ស ដល់នរណាក៏ដោយមិនពាក់ព័ន្ធ ឬជះឥទ្ធិពលមកលើកម្ពុជាឡើយ ហើយបានបញ្ជាក់ថា ករណីកញ្ញា ឈឹម ស៊ីថរ ជាការអនុវត្តច្បាប់ចំពោះអំពើល្មើសរបស់បុគ្គលរូបនេះ តាមអង្គហេតុ និងអង្គច្បាប់ត្រឹមត្រូវ។

ការលើកឡើងនេះ បន្ទាប់ពីក្រសួងការបរទេសសហរដ្ឋអាមេរិក កាលពីថ្ងៃទី ១ ខែកុម្ភៈ ឆ្នាំ ២០២៣ បានប្រកាសថា កញ្ញា ឈឹម ស៊ីថរ មេសហជីពមួយរូបនៅកម្ពុជា គឺជាម្ចាស់ពានម្នាក់ក្នុងចំណោម ១០ រូបជុំវិញសាកលលោក ដែលទទួលពានរង្វាន់អ្នកការពារសិទ្ធមនុស្សប្រចាំឆ្នាំ។

លោក ​កត្តា អ៊ន​ អ្នក​នាំ​ពាក្យ​គណៈកម្មាធិការ​​សិទ្ធិមនុស្ស​កម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ៣ ខែកុម្ភៈនេះថា ករណីកញ្ញា ឈឹម ស៊ីថរ ជាការអនុវត្តច្បាប់ចំពោះអំពើល្មើសរបស់បុគ្គលរូបនេះ តាមអង្គហេតុ និងអង្គច្បាប់ត្រឹមត្រូវ ដែលពុំមែនជាការរំលោភសិទ្ធិមនុស្សណាមួយឡើយ។

លោកមានប្រសាសន៍បន្តថា ពានរង្វាន់អ្នកការពារសិទ្ធិមនុស្សរបស់ក្រសួងការបរទេសអាមេរិក ជារឿងរបស់អាមេរិក ដែលចង់ឲ្យនរណាមិនពាក់ព័ន្ធ ឬជះឥទ្ធិពលមកលើកម្ពុជាឡើយ។ លោក ​កត្តា អ៊ន​ បានលើកឡើងដែរថា «យើងទាំងអស់គ្នាដឹងហើយថា នយោបាយការបរទេសរបស់អាមេរិក គឺប្រឆាំងនិងប្រទេសទាំងឡាយ ដែលជាចំណុចរសើបចំពោះភូមិសាស្រ្តនយោបាយរបស់គាត់ និងគាត់យល់ថាប្រទេសនោះមិនបម្រើនយោបាយរបស់គាត់។ កម្ពុជាជារដ្ឋឯករាជ្យ អធិបតេយ្យ និងមិនចូលបក្សសម្ព័ន្ធ។ កម្ពុជារស់នៅដោយសន្តិភាព មិត្តភាព សន្តិសហវិជ្ជមាន។ អាមេរិក ចិន អឺរ៉ុប និងប្រទេសនានាលើសកលលោកគឺជាមិត្តរបស់កម្ពុជា»។

អ្នក​នាំ​ពាក្យ​គណៈកម្មាធិការ​​សិទ្ធិមនុស្ស​កម្ពុជា ក៏បានលើកឡើងជាសំណួរដែរថា «តើពានរង្វាន់នេះសម្រាប់ផ្តល់ដល់អ្នកប្រឆាំងរដ្ឋាភិបាល ឬអ្នកប្រព្រឹត្តខុសច្បាប់នៃរដ្ឋ ដែលហ៊ានងើបប្រឆាំងរដ្ឋាភិបាលឬ? ចុះរាជរដ្ឋាភិបាល និងប្រជាពលរដ្ឋ ដែលធ្វើការងារសិទ្ធិមនុស្សត្រឹមត្រូវតាមច្បាប់ នឹងមិនទទួលបានពានរង្វាន់នេះទេឬ?។

ជាមួយគ្នានេះ លោក ​កត្តា អ៊ន​ អ្នក​នាំ​ពាក្យ​គណៈកម្មាធិការ​​សិទ្ធិមនុស្ស​កម្ពុជា បានបញ្ជាក់ដែរថា ស្ថានភាពសិទ្ធិមនុស្សនៅកម្ពុជា មិនស្ថិតនៅលើមាត់ ឬសំណេររបស់ជនណា ឬអង្គការសង្គមស៊ីវិលណា ឬប្រទេសណាទេ។ សិទ្ធិមនុស្សនៃប្រទេសកម្ពុជា ត្រូវបានធានាដោយរដ្ឋធម្មនុញ្ញ និងច្បាប់នៃប្រទេសកម្ពុជា និងកតិការ អនុសញ្ញាអន្តរជាតិសិទ្ធិមនុស្ស ដែលកម្ពុជាជារដ្ឋភាគី មានន័យថា ប្រជាជនកម្ពុជាមានសិទ្ធិសេរីភាពពេញលេញ និងទូលំទូលាយដោយគ្មានការយារយី ឬរឹតត្បិតណាមួយទេ។

លោកបញ្ជាក់ទៀតថា ប្រជាពលរដ្ឋត្រូវប្រើប្រាស់សិទ្ធិសេរីភាពដោយគោរពច្បាប់ និងសិទ្ធិសេរីភាពអ្នកដ៏ទៃ។ ម្យ៉ាងទៀត អាជ្ញាធរមានតួនាទីអនុវត្តច្បាប់ ចំពោះជនណាដែលប្រើសិទ្ធិសេរីភាពបំពានច្បាប់។ ទាំងសិទ្ធិសេរីភាពរបស់ប្រជាពលរដ្ឋ និងតួនាទីរបស់សមត្ថកិច្ច ត្រូវធានាដោយរដ្ឋធម្មនុញ្ញដូចគ្នា។

សូមជម្រាបថា កាលពីថ្ងៃទី ២៦ ខែវិច្ឆិកា ឆ្នាំ ២០២២ នគរបាលបានចាប់ខ្លួនឈ្មោះ ឈឹម ស៊ីថរ អតីតបុគ្គលិកក្រុមហ៊ុនណាហ្គាវើលដ៍​ និងជាប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍​ បន្ទាប់ពីបុគ្គលរូបនេះធ្វើដំណើរមកពីប្រទេសអូស្ត្រាលី ចូលមកប្រទេសកម្ពុជាវិញ។ បើតាមសមត្ថកិច្ច ការចាប់ខ្លួននេះ គឺអនុវត្តតាមដីកាបង្គាប់ឲ្យនាំខ្លួនរបស់លោក អឹម វណ្ណៈ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី ២៣ ខែវិច្ឆិកា ឆ្នាំ ២០២២។ 

បុគ្គលឈ្មោះ ឈឹម ស៊ីថរ ដែលតែងតែដឹកនាំធ្វើបាតុកម្មខុសច្បាប់នៅមុខក្រុមហ៊ុនណាហ្គាវើលដ៍ ត្រូវបានសមត្ថកិច្ចចាប់ខ្លួន ពាក់ព័ន្ធនឹងការញុះញង់ឲ្យមានការប្រមូលផ្តុំតវ៉ាដោយខុសច្បាប់ កាលពីរសៀល​ថ្ងៃទី ៤ ខែមករា ឆ្នាំ ២០២២។ ក្រោយមកនៅថ្ងៃទី ១២ ខែមីនា ឆ្នាំ ២០២២ បុគ្គលឈ្មោះ ឈឹម ស៊ីថរ បានយល់ព្រមធ្វើកិច្ចសន្យាមួយ ដោយគោរព ជូនរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ដើម្បីដោះស្រាយបញ្ចប់បញ្ហាវិវាទជាមួយក្រុមហ៊ុនណាហ្គាលវើលដ៏ ក៏ដូចជាផលប្រយោជន៍ស្របច្បាប់គ្រប់ភាគី។

បន្ទាប់មកទៀត សាលាដំបូងរាជធានីភ្នំពេញ នៅថ្ងៃទី ១៤ ខែមីនា ឆ្នាំ ២០២២ បានចេញដីកាសម្រេចមួយដោយដាក់ជនត្រូវចោទឈ្មោះ ឈឹម ស៊ីថរ ឲ្យស្ថិតនៅក្រោមការត្រួតពិនិត្យតាមផ្លូវតុលាការពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅប្រទេសកម្ពុជា កាលពីអំឡុងឆ្នាំ ២០២១ និងពេលបន្តបន្ទាប់ តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ»។ នៅក្នុងដីកាសម្រេចនោះ ចៅក្រមស៊ើបសួរ នៃសា​លាដំបូងរាជធានីភ្នំពេញ បានដាក់លក្ខខណ្ឌដល់ជនត្រូវចោទឈ្មោះ ឈឹម ស៊ីថរ មិនត្រូវចាកចេញក្រៅដែនដី នៃព្រះរាជាណាចក្រកម្ពុជា ដោយគ្មានការអនុញ្ញាតពីអាជ្ញាធរតុលាការឡើយ។

ក៏ប៉ុន្តែបុគ្គលឈ្មោះ ឈឹម ស៊ីថរ មិនបានអនុវត្តតាមសេចក្តីសម្រេចរបស់តុលាការឡើយ ដោយកាលពីថ្ងៃទី ១៥ ខែ វិច្ឆិកា ឆ្នាំ ២០២២ ស្ត្រីរូបនេះបានចេញទៅប្រទេសអូស្រ្តាលី។ ដូច្នេះនៅពេលចូលមកដល់ប្រទេសកម្ពុជាវិញ ក៏ត្រូវសមត្ថកិច្ចចាប់ឃាត់ខ្លួនតែម្ដង៕

អត្ថបទ៖ ឃួន សុភ័ក្រ