តើអ្នកស្ម័គ្រចិត្តព្រឹត្តិការណ៍ស៊ីហ្គេមឆ្នាំ២០២៣ ទទួលបានអត្ថប្រយោជន៍អ្វីខ្លះ?

ក្នុងនាមកម្ពុជាជាម្ចាស់ផ្ទះរៀបចំ​ការព្រឹត្តិការណ៍​កីឡា​ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ ២០២៣​លើក​ដំបូង​ កម្ពុជាបានប្រកាសជ្រើសរើសអ្នកស្ម័គ្រចិត្តចំនួន ៧ពាន់នាក់ លើតួនាទីផ្សេងៗសម្រាប់ត្រៀមក្នុងមហា​ព្រឹត្តិការណ៍​នេះឱ្យដំណើរការរលូនល្អ កាលពីថ្ងៃទី០១ ខែកុម្ភៈ ឆ្នាំ២០២៣។ តើអ្នកស្ម័គ្រចិត្តទទួលបានអត្ថប្រយោជន៍អ្វីខ្លះ?

សម្រាប់អ្នកស្ម័គ្រចិត្តទាំង ៧ពាន់នាក់ គឺអាចជ្រើសរើសតាមតួនាទី ដែលខ្លួនចាប់អារម្មណ៍មានដូចជា ក្រុមការងារមួយណាក៏បាន, ក្រុមការងារពិធីបើក-បិទ, ក្រុមការងារពិធីការ, ក្រុមការងារស្នាក់នៅ ហូបចុក និងដឹកជញ្ជូន, ក្រុមការងារផ្សព្វផ្សាយ និងព័ត៌មាន, ក្រុមការងារវេជ្ជសាស្ត្រកីឡា និងដូពីង, ក្រុមការងារទីលានប្រកួត, ក្រុមការងារទីផ្សារ និងចូលនូបត្ថម្ភ, ក្រុមការងារវប្បធម៌ បរិស្ថាន និងអប់រំកីឡា, ចុងក្រោយគឺ ក្រុមការងារហ្គេមព័ត៌មានវិទ្យា (Games IT Team)។

ក្រសួងអប់រំ យុវជន និងកីឡា បានបង្ហោះនៅក្នុងផេកហ្វេសបុក កាលពីថ្ងៃទី០៣ ខែកុម្ភៈ ឆ្នាំ២០២៣ អំពីអត្ថប្រយោជន៍ដែលទទួលបានសម្រាប់អ្នកស្ម័គ្រចិត្តមានដូចជា៖

-អាវយឺតចំនួន ២

-ខោចំនួន ២

-មួកចំនួន ១

-កាតាបចំនួន ១

-លិខិតថ្លែងអំណរគុណ

-បទពិសោធន៍ការងារ

-ផ្គត់ផ្គង់អាហារ ដោយបានគិតគូរដល់បងប្អូនខ្មែរឥស្លាម និងអ្នកមានប្រតិកម្មអាហារផ្សេងៗ​។

សូមជម្រាបថា ប្រសិនជាសាធារណជនមានចំណាប់អារម្មណ៍ចង់ចូលរួមការងារស្ម័គ្រចិត្តដើម្បីសម្របសម្រួលដល់ដំណើរការព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ អាចចុះឈ្មោះតាមរយៈ https://cambodia2023.com/km/volunteer-register និងបំពេញតាមលក្ខខណ្ឌផ្សេងៗ។ ផុតកំណត់ទទួលពាក្យនៅថ្ងៃទី១១ ខែមីនា ឆ្នាំ២០២៣៕