អង់គ្លេស សន្យានឹងបន្តជួយគាំទ្រ​ដល់វិស័យសុខាភិបាលនៅកម្ពុជា

លោក Dominic Williams ឯកអគ្គរាជទូតវិសាមញ្ញ និងពេញសមត្ថភាព នៃចក្រភពអង់គ្លេស​ប្រចាំព្រះរាជាណាចក្រកម្ពុជាបានសន្យាថា នឹងបន្តជួយគាំទ្រវិស័យសុខាភិបាលនៅកម្ពុជាបន្ថែមទៀត តាមរយៈយន្តការទ្វេភាគី ពហុភាគី។

ការសន្យានេះបានធ្វើឡើងកាលពីរសៀលថ្ងៃទី៣ ខែកុម្ភៈ ឆ្នាំ២០២៣ ជាមួយលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលនៅទីស្តីការក្រសួង។

នៅក្នុងជំនួបនោះ ឯកអគ្គរាជទូត បានថ្លែងអបអរសាទរ និងកោតសរសើររាជរដ្ឋាភិបាលកម្ពុជា និងក្រសួងសុខាភិបាល ក្នុងកិច្ចខិតខំប្រឹងប្រែងគ្រប់គ្រង ទប់ស្កាត់ ការរីករាលដាលជំងឺកូវីដ-១៩ នៅកម្ពុជា ក្នុងរយៈពេលជាង២ឆ្នាំ​កន្លងមកនេះបានទទួល ជោគជ័យដែលអាចឱ្យកម្ពុជាបើកដំណើរការប្រទេសទាំងសកម្មភាពសេដ្ឋកិច្ច និងសង្គមឡើងវិញ ចាប់តាំងពីខែវិច្ឆិកា ឆ្នាំ២០២១។

លោកឯកអគ្គរាជទូត ក៏បានកោតសរសើរនូវកាយវិការមនុស្សធម៌ និងថ្លែងអំណរគុណដល់រាជរដ្ឋាភិបាលកម្ពុជា ដែលបានទទួលឱ្យនាវាទេសចរណ៍ Westerdam ចូលចតកាលពីថ្ងៃទី១៤ ខែកុម្ភៈ ឆ្នាំ២០២០ ព្រមទាំងបាន​ផ្ដល់វ៉ាក់សាំងកូវីដ-១៩ ជូនដល់មន្ត្រី និងបុគ្គលិកស្ថានទូតអង់គ្លេស ប្រចាំកម្ពុជា ព្រមទាំងសមាជិកគ្រួសារ​របស់ពួកគេទាំងអស់ដោយឥតគិតថ្លៃ។

លោកសាស្ត្រាចារ្យ ម៉ម ប៊ុនហេង បានសម្ដែងអំណរគុណ​យ៉ាង​ជ្រាលជ្រៅ​ជូន​រដ្ឋាភិបាល​នៃចក្រភពអង់គ្លេស ដែលតែងតែជួយគាំទ្រទាំងថវិកា និងបច្ចេកទេស​ដល់វិស័យ​សុខាភិបាលកម្ពុជា តាំងពី​កម្មវិធី​កំណែទម្រង់​វិស័យសុខាភិបាល រហូតមក ជាពិសេសក្នុង​កាលៈទេសៈ​ដែលព្រះរាជាណាចក្រកម្ពុជា ក៏ដូចជា​ពិភព​លោក​បានកំពុងតែជួបប្រទះនឹងវិបត្តិ នៃការឆ្លងរាលដាលជំងឺកូវីដ-១៩។

ជាមួយរដ្ឋាភិបាល នៃចក្រភពអង់គ្លេស បានផ្តល់​ជូន​រាជរដ្ឋាភិបាល ​និងប្រជាជនកម្ពុជា នូវវ៉ាក់សាំងកូវីដ-១៩ ប្រភេទ AstraZeneca ចំនួន ៤១៥.០០០ដូស និងមួយ​ចំនួនទៀតតាមរយៈយន្តការកូវ៉ាក់។ លើសពីនេះទៀត តាមរយៈអង្គការ​សុខភាពពិភពលោក ចក្រភពអង់គ្លេស ក៏បានជួយគាំទ្រកម្ពុជា ក្នុងកិច្ចខិតខំប្រឹងប្រែង ដើម្បីជំរុញវិធានការការពារ ទប់ស្កាត់ និង​ឆ្លើយ​តបការរាតត្បាត នៃជំងឺកូវីដ-១៩ ដូចជាការ​បណ្តុះបណ្តាលធនធានមនុស្ស និង​ហេដ្ឋារចនាសម្ព័ន្ធ​សុខាភិបាលជាដើម៕ សំអឿន