វណ្ណដា និង ឡូរ៉ា ម៉ម ស្ដាប់ឱវាទព្រះគ្រូ គូ សុភាព

តារាចម្រៀងរ៉េបលោក ម៉ាន់ វណ្ណដា និងស្ថាបនិកផលិតកម្មបារមី ឡូរ៉ា ម៉ម បានដឹកនាំក្រុមការងារ ស្កាត់ទៅ វត្តនិគ្រោធវ័នហៅវត្តគល់ទទឹងដើម្បីទស្សនា និងស្ដាប់ឱវាទរបស់ព្រះគ្រូ គូ សុភាព សម្រាប់តាំងអារម្មណ៍ ឲ្យមានសទ្ធាជ្រះថ្លា។

ការបង្ហាញខ្លួនដោយចិត្តជ្រះថ្លាផ្សាភ្ជាប់នៅក្នុងវិស័យព្រះពុទ្ធសាសនាពីសំណាក់កំពូលតារាចម្រៀងរ៉េបវ័យក្មេងលោក វណ្ណដា និង ឡូរ៉ា ម៉ម កាន់តែទទួលបានការកោតសរសើរ និងការគាំទ្រខ្លាំងថែមទៀតពីសំណាក់ មហាជន នៅគ្រប់ទិសទី។ នេះជាទង្វើរដ៏ល្អប្រពៃ និងគំរូសម្រាប់បណ្តាមជ្ឈដ្ឋានអ្នកគាំទ្រតារាចម្រៀងរ៉េបរូបនេះ។

ដោយឡែកងាកទៅចាប់អារម្មណ៍នៅលើទំព័រហ្វេសប៊ុករបស់ព្រះគ្រូ គូ សុភាព បានចែករំលែករូបភាពបញ្ជាក់​ពីទឹកចិត្តជ្រះថ្លារបស់ វណ្ណដា និងឡូរ៉ា ម៉ម ដូច្នេះថា ប្អូនប្រុស Vann Da – វណ្ណដា និងកញ្ញា Laura Mam អញ្ជើញមកទស្សនា និងស្ដាប់ឱវាទនៅវត្តនិគ្រោធវ័ន គល់ទទឹង។

ចំណែកកញ្ញា ឡូរ៉ា ម៉ម បានបញ្ចេញអារម្មណ៍ក្រោយទទួលស្ដាប់ឱវាទព្រះគ្រូ គូ សុភាព បែបនេះថា ថ្ងៃនេះ នាងខ្ញុំ និង Vann Da – វណ្ណដា ពិតជាមានសេចក្ដីសោមនស្ស និងអំណរគុណជាខ្លាំងដល់លោកគ្រូ Kou Sopheap ដែលបានដឹកនាំបង្រៀននិងផ្ដល់នូវបរិយាកាសដ៏ស្ងប់ស្ងៀមសម្រាប់តាំងអារម្មណ៍ឲ្យមានសទ្ធាជ្រះថ្លា សមាធិ ដាក់ខ្លួននិង មានអំណរគុណដល់គ្រប់យ៉ាងដែលពិភពលោកនេះបានផ្ដល់ឲ្យពួកយើង៕ ចាន់រ៉ា