អាហារូបករណ៍ ចេនហ្ស៊ី ផ្តល់ឱ្យសិស្សមានបំណងសិក្សានៅសាកលវិទ្យាល័យ៣

មូលនិធីព្រីនស៍ ផ្តល់អាហារូបករណ៍ចេនហ្ស៊ី (Chen Zhi)  ជំនាន់ទី២សម្រាប់ឆ្នាំសិក្សា២០២៣ ដល់សិស្សានុសិស្សដែលបានបញ្ចប់ថ្នាក់បាក់ឌុប ឆ្នាំ២០២១ ឬ ឆ្នាំ២០២២ មានបំណងចង់បន្តការសិក្សានៅសាកលវិទ្យាល័យចំនួននៅភ្នំពេញ។ អាហារូបករណ៍នេះ ក៏មានការចូលរួមពីក្រសួងអប់រំ យុវជន និងកីឡាផងដែរ។

អាហារូបករណ៍ចេនហ្ស៊ី ផ្តល់ជូននៅ៣សាកលវិទ្យាល័យមានដូចជា សាកលវិទ្យាល័យភូមិន្ទភ្នំពេញ សាកលវិទ្យាល័យជាតិគ្រប់គ្រង និងវិទ្យាស្ថានបច្ចេកវិទ្យាកម្ពុជា។ កម្មវិធីអាហារូបករណ៍បានផ្តល់នូវអាហារូបករណ៍ពេញលេញ ប្រាក់ឧបត្ថម្ភ និងកម្មវិធីអភិវឌ្ឍខ្លួនដល់សិស្សានុសិស្ស កម្មសិក្សា និងឱកាសការងារដល់និស្សិតសាកលវិទ្យាល័យកម្ពុជាចំនួន ៤០០ នាក់ក្នុងរយៈពេលប្រាំពីរឆ្នាំ។

សម្រាប់មុខជំនាញសិក្សាផ្សេងៗនៅក្នុងសាកលវិទ្យាល័យទាំង៣ ដែលមូនិធិផ្តល់អាហារូបករណ៍មានដូចជា៖

១.សាកលវិទ្យាល័យភូមិន្ទភ្នំពេញ (RUPP)

– ផ្នែកវិស្វកម្មបច្ចេកវិទ្យាព័ត៌មាន

– ផ្នែកព័ត៌មានវិទ្យា

– ផ្នែកការគ្រប់គ្រងពាណិជ្ជកម្មអន្តរជាតិ

– ផ្នែកប្រព័ន្ធផ្សព្វផ្សាយ និងសារគមនាគមន៍។

២.វិទ្យាស្ថានបច្ចេកវិទ្យាកម្ពុជា(ITC)

– ផ្នែកវិស្វកម្មសំណង់ស៊ីវិល។

៣.សាកលវិទ្យាល័យជាតិគ្រប់គ្រង(NUM)

– ផ្នែកសេដ្ឋកិច្ចឌីជីថល

– ផ្នែកទេសចរណ៍ និងបដិសណ្ឋារកិច្ច។

រីឯ លក្ខខណ្ឌក្នុងការចុះឈ្មោះ និសិត្សត្រូវតែមានសញ្ជាតិខ្មែរ និងជាសិស្សបញ្ចប់ថ្នាក់ទុតិយភូមិឆ្នាំ២០២១ ឬ ឆ្នាំ២០២២។ ចំពោះសិស្សនិស្សិតដែលមានបំណងចង់ដាក់ពាក្យអាហារូបករណ៍នេះ គឺអាចដាក់បានតាមរយៈ shorturl.at/fLOU2 ។ ផុតកំណត់ទទួលពាក្យនៅថ្ងៃទី១០ ខែកុម្ភៈ ឆ្នាំ២០២៣ខាងមុខ។

សូមជម្រាបថា បេក្ខជនដែលជាប់ក្នុងវគ្គដាក់ពាក្យតាមប្រព័ន្ធអនឡាញតាមតំណភ្ជាប់ខាងលើ គឺត្រូវជួបសម្ភាសន៍ផ្ទាល់នៅថ្ងៃទី២៥ ខែកុម្ភៈ ឆ្នាំ២០២៣។ ការសម្ភាសន៍ធ្វើឡើងពីរភាសាគឺភាសាខ្មែរ និងភាសាអង់គ្លេស។ សម្រាប់សម្ភាសន៍ជាភាសាខ្មែរគឺសម្ភាសន៍សម្រាប់សិស្សានុសិស្សដែលចង់សិក្សានៅសាកលវិទ្យាល័យភូមិន្ទភ្នំពេញ (RUPP) និងវិទ្យាស្ថានបច្ចេកវិទ្យាកម្ពុជា (ITC)។ សម្រាប់សិស្សដែលមានបំណងសិក្សានៅសាកលវិទ្យាល័យជាតិគ្រប់គ្រង (NUM) ត្រូវសម្ភាសន៍ជាភាសាអង់គ្លេស៕

ដោយ៖ អុន ស្រីមាន