ព័ត៌មានជាតិ

បង្កើតវិទ្យាល័យក្នុងភូមិ សិស្សមិនបាច់ធ្វើដំណើរ ១៧ គីឡូម៉ែត្រ ទៅសាលា

បានផុស

២ years មុន

នៅ

ថ្ងៃពុធ ៨ កុម្ភៈ ២០២៣

ដោយ

វិទ្យាល័យជីផាត ដែលបានបង្កើតឡើងរយៈពេលប្រមាណ ៣ ឆ្នាំមកនេះ បានសម្រួលការលំបាកដល់សិស្សមិនបាច់ធ្វើដំណើរឆ្ងាយផ្ទះ និងមានសុវត្ថិភាពក្នុងការធ្វើដំណើរទៅមកសាលារៀន។ នេះបើតាមការលើកឡើងរបស់លោក ម៉ាច វិបុល ជាជំទប់ទី២ នៃភូមិជីផាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ម៉ាច វិបុល ជាជំទប់ទី២ នៃភូមិជីផាត បានឱ្យដឹងថា វិទ្យាល័យជីផាតដែលស្ថិតនៅភូមិជីផាត ឃុំជីផាត ស្រុកថ្មបាំង ខេត្តកោះកុង ដំណើរការថ្នាក់វិទ្យាល័យបានជាង ៣ ឆ្នាំមកហើយ ក្រោមគំនិតផ្តួចផ្តើមសហការពីសំណាក់លោកគ្រូនាយកសាលា អាជ្ញាធរមូលដ្ឋាន ដើម្បីជួយឱ្យសិស្សអាចបន្តការសិក្សាបានច្រើនជាងមុន។

ការដំណើរការវិទ្យាល័យនេះ ដោយសារមើលឃើញពីទុក្ខលំបាករបស់សិស្សានុសិស្ស ការចំណាយថវិកាច្រើនពីអាណាព្យាបាល ខាតបង់ពេលវេលាច្រើន នៅក្នុងការធ្វើដំណើរទៅមក។ ជាងនេះទៀតគឺសុវត្ថិភាព និងការជំរុញឲ្យសិស្សកុំឲ្យបោះបង់ការសិក្សា ទើបលោកគ្រូនាយកសាលា គណៈគ្រប់គ្រង អាជ្ញាធរមូលដ្ឋាន ផ្តួចផ្តើមគំនិតបង្កើតឲ្យថ្នាក់កម្រិតវិទ្យាល័យនេះឡើង។

លោក ម៉ាច វិបុល បានបញ្ជាក់ថា «កាលពីមុន សិស្សប្រសិនបើចង់បន្តការសិក្សានៅថ្នាក់វិទ្យាល័យ ពួកគេត្រូវទៅសិក្សានៅវិទ្យាល័យអណ្ដូងទឹកមានចម្ងាយប្រហែល ១៨-១៩ គីឡូម៉ែត្រដោយត្រូវជួលផ្ទះ ឬបន្ទប់ជួលនៅទីនោះ ព្រោះនៅឆ្ងាយពីភូមិ»។

យ៉ាងណាមិញ វិទ្យាល័យជីផាតដែលបានបង្កើតឡើងមក ៣ឆ្នាំនេះ ក៏នៅមានភាពខ្វះខាតនៅឡើយ ព្រោះសិស្សកម្រិតវិទ្យាល័យគឺត្រូវរៀនបន្ទប់អគារអនុវិទ្យាល័យចាស់នៅឡើយ»។ នេះបើតាមការបញ្ជាក់របស់លោក ម៉ាច វិបុល បន្ថែម។

ជាមួយគ្នានេះដែរ បើទោះបីជាមានការបង្កើតនៅវិទ្យាល័យក្នុងភូមិក៏ពិតមែន ប៉ុន្តែអត្រាសិស្សដែលបានបន្តការសិក្សាមានចំនួនតិចតួចបំផុត ហើយសិស្សដែលបានទៅប្រឡងសញ្ញាប័ត្រមធ្យមសិក្សាទុតិយភូមិសម័យប្រឡង ០៥ ឆ្នូ ២០២២ នេះ មានប្រមាណតែជាង ១០នាក់ប៉ុណ្ណោះ។

ជុំវិញបញ្ហានេះ លោក ម៉ាច វិបុល បានគូសបញ្ជាក់ថា «តាមការមើលឃើញជាក់ស្តែងគឺកត្តាជីវភាព ព្រោះសិស្សជាច្រើននៅតំបន់ជីផាត គ្រួសារមានជីវភាពខ្វះខាត ដែលមិនមានលទ្ធភាពគ្រប់គ្រាន់អាចឱ្យពួកគេរៀនបន្តបាន ដូច្នេះ សិស្សត្រូវឈប់សិក្សាត្រឹមថ្នាក់ទី ៩ ឬទី ១០ ដើម្បីស្វែងរកការងារធ្វើ»។

ដោយហេតុថាសិស្សដែលបន្តការសិក្សាដល់ថ្នាក់ទី ១២ មានចំនួនតិចតួចខ្លាំង អាជ្ញាធរមូលដ្ឋាននិងគណៈគ្រប់គ្រងសាលា តែងតែខិតខំប្រឹងប្រែងចុះជួបផ្ទាល់ដល់អាណាព្យាបាលសិស្ស ជួយអប់រំដល់កូនៗ ជួយជំរុញឱ្យពួកគេមកបន្តការសិក្សា និងខិតខំសិក្សាឱ្យបានចប់ថ្នាក់ទី១២។

លោក ម៉ាច វិបុល បានលើកគោលបំណងមួយក្នុងការបង្កើតថ្នាក់អប់រំកម្រិតវិទ្យាល័យក្នុងភូមិនេះ «គឺចង់ឱ្យសិស្ស អាចសិក្សារៀនសូត្រ ទទួលបានចំណេះដឹង ឈានសម្រេចគោលបំណងនាពេលអនាគត ព្រមទាំងជួយអភិវឌ្ឍភូមិឃុំដោយសារជីផាតក៏ជាតំបន់ទេសចរណ៍ ហើយកាលណាប្រជាជនក្នុងភូមិមានចំណេះដឹងច្រើន និងនាំការរីកចម្រើនជួយលើកស្ទួយជីវភាពពលរដ្ឋក្នុងមូលដ្ឋានផងដែរ»៕