មន្ទីរទេសចរណ៍ស្ទឹងត្រែងឱ្យសហគមន៍រមណីយដ្ឋានសម្រស់កោះហានលើកកម្ពស់វិស័យទេសចរណ៍

រមណីយដ្ឋានសម្រស់កោះហាន​ស្ថិតនៅឃុំកោះស្នែង ខេត្តស្ទឹងត្រែង មិនទាន់មានការអភិវឌ្ឃខ្លួន​ឱ្យរីកចម្រើនទៅតាម​ស្ដង់ដា នៃវិស័យទេសចរណ៍នៅឡើយទេ ហើយមន្ទីរទេសចរណ៍ជំរុញឱ្យមាន​ការរៀបចំឡើងដើម្បី​ទាញយកប្រាក់ចំណូលសម្រាប់កែប្រែជីវភាព។

​លោក អ៊ន ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបានបញ្ជាក់ថា៖ ​សក្តានុពលទេសចរណ៍​ ធនធាន​ធម្មជាតិ ជាធ្នាក់ទាក់ទាញភ្ញៀវទេសចរជាតិ និងអន្តរជាតិបានមកឃើញម្តងហើយចង់មកឃើញម្តងទៀត។

​លោកបន្តថា សមាជិកសហគមន៍កោះហានសមល្មម​ដល់ពេលត្រូវរួមគ្នា​លើកស្ទួយវិស័យ​ទេសចរណ៍ ព្រោះមន្ទីរ និងអង្គការដៃគូបានជួយផ្ចុងផ្ដើមជិត ១០ ឆ្នាំមកហើយ ពេលនេះយើងបានបណ្តុះបណ្តាលឱ្យមានជំនាញផ្នែក បដិសណ្ឋារកិច្ច ផ្ទះស្នាក់ អាហារដ្ឋាន និងសេវាកម្មផ្សេងៗជាច្រើនទៀត។

​លោក លីម សៃ តំណាងឱ្យសហគមន៍ទេសចរណ៍កោះហានប្រាប់ថា លោកនឹងពិគ្រោះគ្នាជាមួយសមាជិកទាំងអស់ដើម្បីបែងចែកកិច្ចការងារក្នុងសហគមន៍ទទួលខុសត្រូវទាំងផ្នែកសេវាកម្មដឹកជញ្ជូន មគ្គទេសក៍ ទេសចរណ៍ និងទីតាំងកម្សាន្តជាដើម។

លោក ពេជ្រ ដារ៉ា ប្រធានការរិល័យអភិវឌ្ឍវិស័យទេសចរណ៍ នៃមន្ទីរទេសចរណ៍ខេត្តស្ទឹងត្រែងបានបញ្ជាក់ថា៖ មន្ទីរនឹងជួយផ្សព្វផ្សាយមន្ថែមពីសក្តានុពល នៃតំបន់សហគមន៍នេះព្រោះវាមានភាពទាក់ទាញច្រើន ដូចជាកន្លែងរបរដងជរ័ជនជាតិដើមភាគតិច ព្រៃឈើធំៗ សត្វក្អែកទឹកនៅលើកោះ និងទេស​ភាព​តាមតំបន់រាមសារ នៃដងទន្លេមេគង្គបន្ថែមទៀត។

សូមបញ្ចាក់ថា៖ នេះជាលើកទីមួយហើយនៅឆ្នាំ២០២៣​ ដែលមន្ទីរទេសចរបានបណ្តុះបណ្តាល​ផ្នែក​ជំនាញដល់សហគមន៍​ដើម្បីលើកស្ទួយវិស័យទេសចរណ៍នៅតាមមូលដ្ឋានដែលមានសក្តានុពលស្រាប់៕

អត្ថបទ៖ ងិន លីម