ក្រសួងអប់រំ ណែនាំ ការលើកកម្ពស់ការសិក្សាភាសា និងអរិយធម៌ខ្មែរ នៅគ្រឹះស្ថានសិក្សាឯកជន

បណ្ឌិតសភាចារ្យ ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា នៅថ្ងៃទី១៣ ខែកុម្ភៈ ឆ្នាំ២០២៣នេះ បានសេចក្ដីណែនាំ ស្តីពី ការលើកកម្ពស់ការសិក្សាភាសាខ្មែរ និងវប្បធម៌ អរិយធម៌ខ្មែរ នៅតាមគ្រឹះស្ថានសិក្សាចំណេះទូទៅឯកជនដែលអនុវត្តកម្មវិធីសិក្សាអន្តរជាតិ។

បណ្ឌិតសភាចារ្យ ហង់ជួន ណារ៉ុន លើកឡើងថា ដើម្បីលើកកម្ពស់ការបង្រៀនភាសាខ្មែរ និងការយល់ដឹងពីវប្បធម៌ និងអរិយធម៌ខ្មែរ ដល់សិស្សានុសិស្ស ដែលមានសញ្ញាតិខ្មែរ ចាប់ពីឆ្នាំសិក្សា ២០២២-២០២៣ នេះតទៅ ក្រសួងអប់រំ យុវជន និងកីឡាសូមធ្វើ ការណែនាំដល់គ្រប់ “គ្រឹះស្ថានសិក្សាចំណេះទូទៅឯកជន ដែលអនុវត្តកម្មវិធីសិក្សាអន្តរជាតិ” ដូចខាងក្រោម៖

១. តម្រូវឱ្យសិស្សានុសិស្សដែលមានសញ្ជាតិខ្មែរ ជ្រើសរើសមុខវិជ្ជាភាសាខ្មែរ ជាមុខវិជ្ជាកាតព្វកិច្ច

២. គ្រឹះស្ថានសិក្សាត្រូវរៀបចំ និងបង្រៀនមុខវិជ្ជាចំណេះដឹងទូទៅស្តីពី វប្បធម៌ និងអរិយធម៌ខ្មែរ

៣. គ្រឹះស្ថានសិក្សាត្រូវដាក់បញ្ចូលកម្មវិធីសិក្សាមុខវិជ្ជាភាសាខ្មែរ និងមុខវិជ្ជាវប្បធម៌ និងអរិយធម៌ខ្មែរ ក្នុងម៉ោងសិក្សារបស់គ្រឹះស្ថានសិក្សា តាមការកំណត់ដែលមានចែងក្នុងលិខិតបទដ្ឋានគតិយុត្ត ដោយឡែករបស់ក្រសួងអប់រំ យុវជន និងកីឡា។

ទទួលសេចក្ដីណែនាំនេះ មន្ទីរអប់រំ យុវជន និងកីឡារាជធានី ខេត្ត ត្រូវផ្សព្វផ្សាយឱ្យបានទូលំទូលាយ ដល់គ្រប់គ្រឹះស្ថានសិក្សាចំណេះទូទៅឯកជន ដែលអនុវត្តកម្មវិធីសិក្សាអន្តរជាតិ ដើម្បីចូលរួមអនុវត្តឱ្យមាន ប្រសិទ្ធភាពខ្ពស់។

គួរបញ្ជាក់ថា បច្ចុប្បន្នមានមាតាបិតា អាណាព្យាបាលមួយចំនួនបានបញ្ជូនកូនឱ្យសិក្សាភាសាបរទេស ឬសាលាអន្តរជាតិមុនចូលសិក្សាភាសាខ្មែរ ឬក៏ផ្ដោតឱ្យសិក្សាភាសាបរទេសជាងភាសាខ្មែរ រហូតកុមារទាំងនោះមិនចេះភាសាខ្មែរ ឬចេះនិយាយភាសាបរទេសមុនចេះនិយាយភាសាខ្មែរ។ កុមារទាំងនោះខ្លះ មិនចង់និយាយភាសាខ្មែរជាអ្នកដទៃសូម្បីតែជីដូនជីតាទៀតក៏មាន ដោយពួកគេថា ពិបាកនិយាយ ខណៈពួកគេចេះភាសាបរទេសមុនភាសាខ្មែរ ហើយម្ដាយឪពុកតែងនិយាយភាសាបរទេសជាមួយកូនៗស្រាប់៕