ស្ថានទូតអន្តរាគមន៍ជួយពលរដ្ឋខែ្មរ១៤នាក់ នៅប្រទេសមីយ៉ាន់ម៉ា

ពលរដ្ឋខែ្មរ១៤នាក់ នៅប្រទេសមីយ៉ាន់ម៉ា នឹងត្រទ្បប់មកដល់កម្ពុជាវិញ នៅវេលាម៉ោង ១២:៣០ នាទី នាថ្ងៃទី ១៣ ខែមករា ឆ្នាំ២០២១នេះ ក្រោមការសម្របសម្រួលពីស្ថានទូតកម្ពុជាប្រចាំសាធារណរដ្ឋសហភាពមីយ៉ាន់ម៉ា។

ដំណើរវិលត្រឡប់មកកម្ពុជាវិញនេះ មានការគាំទ្រ និងកិច្ចសហការល្អរវាងក្រសួងការបរទេស និងសហប្រតិបត្តិការអន្តរជាតិ កម្ពុជា និង ក្រសួងការបរទេសមីយ៉ាន់ម៉ា ស្ថានឯកអគ្គរាជទូតកម្ពុជា ប្រចាំសាធារណរដ្ឋសហភាពមីយ៉ាន់ម៉ា បានសម្របសម្រួលជូនពលរដ្ឋខែ្មរចំនួន ១៤ រូប ដែលនឹងត្រូវធ្វើដំណើរត្រទ្បប់ពីប្រទេសមីយ៉ាន់ម៉ា មកកម្ពុជា តាមជើងយន្តហោះ Relief Flight របស់ក្រុមហ៊ុនអាកាសចរណ៍មីយ៉ាន់ម៉ា (Myanmar Airways International – MAI) លេខៈ 8M 401 ដោយចេញដំណើរពីទីក្រុងយ៉ាងហ្គូន នៅវេលាម៉ោង ១០:០០នាទីព្រឹក មកដល់រាជធានីភ្នំពេញ វេលាម៉ោង ១២:៣០ នាទី នាថ្ងៃទី ១៣ ខែមករា ឆ្នាំ២០២១ នេះ។

ប្រភពពីស្ថានទូតកម្ពុជា ប្រចាំប្រទេសមីយ៉ាន់ម៉ា បានឱ្យដឹងថា នៅថ្ងៃដដែលនេះ ជើងយន្តហោះខាងលើ នឹងធ្វើមាតុភូមិនិវត្តន៍ប្រជាពលរដ្ឋមីយ៉ាន់ម៉ា ចំនួន ៨៧ រូប រួមជាមួយអ្នកធ្វើដំណើរផ្សេងទៀត សរុបទាំងអស់ចំនួន ១០៦ រូប ត្រទ្បប់ទៅកាន់ប្រទេសមីយ៉ាន់ម៉ា ផងដែរ ៕