អភិបាលរាជធានីចុះពិនិត្យទីតាំង​សារមន្ទីរទួលស្លែង ​ខណៈប្រមុខរដ្ឋអាល្លឺម៉ង់​នឹងទៅស្វែងយល់ពីការពិតនៅទីនោះ

លោក ឃួង ស្រេង អភិបាល នៃគណៈអភិបាលរាជធានីភ្នំពេញនៅព្រឹកថ្ងៃទី ១៤ ខែកុម្ភៈនេះ បាន​ដឹក​នាំ​អាជ្ញាធរខណ្ឌបឹងកេងកង និងមន្រ្តីជំនាញពាក់ព័ន្ធចុះពិនិត្យទីតាំង​សារមន្ទីរឧក្រិដ្ឋកម្ម​ប្រល័យ​​ពូជសាសន៍ទួលស្លែង ដើម្បីត្រៀមទទួលប្រតិភូជាន់ខ្ពស់របស់ប្រទេស​អាល្លឺម៉ង់ដែល​នឹង​អញ្ជើញទៅពិនិត្យស្វែងយល់ពីការពិតនៃរបបប្រល័យពូជសាសន៍ប៉ុលពតនៅក្នុងសារមន្ទីរឧក្រិដ្ឋកម្មប្រល័យពូជសាសន៍ទួលស្លែងនេះ នៅរសៀលទី ១៥ ខែកុម្ភៈ ស្អែកនេះ។​

​លោក ឃួង ស្រេង​ ក្នុងឱកាសនៃការចុះពិនិត្យទីតាំង​នៅជុំវិញសារមន្ទីរឧក្រិដ្ឋកម្មប្រល័យ​ពូជ​សាសន៍​ទួលស្លែងនោះ​បានធ្វើការណែនាំឲ្យអាជ្ញាធរដូចជា មន្ទីរពាក់ព័ន្ធ ពិសេស​ មន្ទីរសាធារ​ណការនិងដឹកជញ្ជូនរាជធានីភ្នំពេញ រៀបចំសំអាតអនាម័យ បរិស្ថាន នៅជុំវិញទីតាំងសារមន្ទីរ​ឧក្រិដ្ឋកម្មប្រល័យពូជសាសន៍ទួលស្លែងនេះ ដោយត្រូវបាញ់ទឹកលាងផ្លូវ ជុំវិញបរិវេណនេះផងដែរ ក្នុងគោលបំណងធ្វើយ៉ាងណាឲ្យទីតាំងនៅជុំវិញ សារមន្ទីរឧក្រិដ្ឋកម្មប្រល័យពូជ​សាសន៍ទួល​ស្លែង​នេះ មានសោភណ្ឌភាពនិងមានបរិស្ថានល្អប្រសើរ ជាមួយនិងការរក្សាបាននូវសន្តិសុខ សណ្តាប់​ធ្នាប់ដ៏ល្អផងដែរ។

​គួរបញ្ជាក់ថា ប្រមុខរដ្ឋ ​និងជាប្រធានាធិបតីនៃសាធាណរដ្ឋសហព័ន្ធអាល្លឺម៉ង់ លោក ហ្រ្វាំង វ៉ាល់ធ័រ ឆ្តែនម៉ៃយ័រ (Frank-Walter Steinmeier) និងលោកជំទាវ អែលឃើ បឿឌិនបិនឌ័រ ( Elke Büdenbender) នឹងបំពេញទស្សនកិច្ចផ្លូវការមកកាន់ព្រះរាជណាចក្រកម្ពុជាពីថ្ងៃទី ១៤ ដល់ថ្ងៃទី ១៦ ខែកុម្ភៈ ឆ្នាំ២០២៣ ហើយនៅរសៀល​ទី ១៥​កុម្ភៈស្អែកនេះលោក ហ្រ្វាំង វ៉ាល់ធ័រ ឆ្តែនម៉ៃយ័រនឹងអញ្ជើញទៅពិនិត្យស្វែងយល់ពីការពិតនៃរបបប្រល័យពូជសាសន៍ប៉ុលពតនៅក្នុងសារមន្ទីរឧក្រិដ្ឋកម្មប្រល័យពូជសាសន៍ទួលស្លែងនេះផងដែរ៕

អត្ថបទ៖ ស្រីរ័ត្ន