ខេត្តកំពង់ធំបញ្ចប់ការងារ​កាត់ឆ្វៀលដីចេញពីបឹងទន្លេសាបជូនពលរដ្ឋ​

ការកែសម្រួលព្រំប្រទល់ដោយកាត់ឆ្វៀលដីចេញពីតំបន់បឹងទន្លេសាបប្រគលជូនប្រជាពលរដ្ឋនៅក្នុងខេត្តកំពង់ធំ បានបញ្ចប់ទាំងស្រុង។

លោក ងួន រតនៈ អភិបាល នៃគណៈអភិបាលខេត្តកំពង់ធំបានឱ្យដឹងនៅថ្ងៃទី ១៤ ខែកុម្ភៈ ឆ្នាំ ២០២៣នេះថា ភូមិឃុំដែលពាក់ព័ន្ធ​ជាមួយនឹងបឹងទន្លេសាប​ នៅក្នុងខេត្តកំពង់ធំបានបញ្ចប់ទាំងស្រុង រួមទាំងផ្ទៃដីជាង ៣ ម៉ឺនហិកតាបានបញ្ចប់ការឆ្វៀលហើយ។

លើកលែងឃុំចំនួនពីរដែលនៅកណ្ដាលទន្លេសាប​ មានឃុំពាមបាង នៃស្រុកស្ទោង និងឃុំ​ផាត់សណ្ដាយ នៃស្រុកកំពង់ស្វាយ។លោក លោកអភិបាលខេត្តកំពង់ធំ បញ្ជាក់ថា ប្រជាពលរដ្ឋរស់នៅក្នុងឃុំនេះជាងរយឆ្នាំមកហើយ ដែលមានវត្តអារាម ខណៈនេះ ក្រុមការងារខេត្តបានចុះទៅទីតាំងផ្ទាល់ដើម្បីសិក្សាលទ្ធភាពកាត់ឆ្វៀលឱ្យកាន់តែតូចកាលណាកាន់តែល្អសម្រាប់ការអភិរក្សធនធានធម្មជាតិ ពីព្រោះនៅទីនោះគាត់មាលំនៅឋានអចិន្ត្រៃដែលមានយូរហើយ និងមនជំរកនារដូវប្រាំង ខណៈរដូវវស្សាពួកគាត់ចល័តទៅតាមទឹក​។ មួយក្រុមគាត់មានផ្ទះរឹងមាំនៅ មួយក្រុមទៀតគាត់ចល័តតាមទឹក។

សូមបញ្ជាក់ថា ខេត្តបានទទួលអនុក្រឹត្យ​ពីប្រមុខរដ្ឋាភិបាល​បានផ្ដល់សិទ្ធឱ្យពួកគាត់​អាស្រ័យផលនៅក្នុងតំបន់ដែលផ្ដល់គោលនយោបាយ។ រដ្ឋបាលខេត្តបានកែសម្រួលព្រំប្រទល់តំបន់២ ពីតំបន់១ ជូនប្រជាពលរដ្ឋបានចំនួនជាង ១ ម៉ឺនគ្រួសារ (១០ ៨០៣) ដែលមានផ្ទៃដីរហូតដល់ ១៧ ៣៣៩ ហិកតា។ គោលយោបាយនេះ គឺបានផ្ដល់សិទ្ធ ជូនប្រជាពលរដ្ឋបន្ថែម ពីតំបន់២ មកតំបន់១ នេះគឺតម្លើងសិទ្ធកាន់កាប់។

ក្រៅពីនេះគឺការសម្រួលព្រំប្រទល់តំបន់ ៣ ​ដែលជាតំបន់ហាមឃាត់ដាច់ខាត មកតំបន់២ ជូនពលរដ្ឋបានទៅដល់​ ៨ ៦៦១ គ្រួសារ ស្មើនឹងផ្ទៃដី ៣ ៤១៥៩ ហិកតា។ ដែលពលរដ្ឋពីដើមពុំមានសុវត្ថិភាពក្នុងការអាស្រ័យផល រហូតមានសិទ្ធិពេញលេញ៕