នាយករដ្ឋមន្ត្រីកម្ពុជា-ឡាវ ជំរុញឲ្យពន្លឿនការរៀបចំវចនានុក្រម ឡាវ-ខ្មែរ និងខ្មែរ-ឡាវ

នាយករដ្ឋមន្ត្រីកម្ពុជា-ឡាវ បានជំរុញឲ្យមន្ត្រីជំនាញនៃប្រទេសទាំងពីរ ពន្លឿនការរៀបចំវចនានុក្រម ឡាវ-ខ្មែរ និងខ្មែរ-ឡាវ។ ការជំរុញនេះ គ្រាដែលសម្ដេចតេជោ ហ៊ុន​ សែន នាយករដ្ឋមន្ត្រីកម្ពុជា បានជួបពិភាក្សាជាមួយលោក សនសៃ ស៊ីផាន់ដន នាយករដ្ឋមន្រ្តីឡាវ កាលពីថ្ងៃទី ១៣ ខែកុម្ភៈ ឆ្នាំ ២០២៣។

នៅក្នុងជំនួបនេះ សម្តេចតេជោ ហ៊ុន សែន និងលោក សនសៃ ស៊ីផាន់ដន បានជួបពិភាក្សាគ្នាយ៉ាងស៊ីជម្រៅអំពីស្ថាន ភាពនៃទំនាក់ទំនងទ្វេភាគី និងទិសដៅអនាគត ដើម្បីបន្តពង្រឹងចំណងមិត្តភាពជាប្រពៃណី ទំនាក់ទំនងដ៏ជិតស្និទ្ធ និងកិច្ចសហប្រតិបត្តិការ រវាងប្រទេសទាំងពីរលើវិស័យជាច្រើន រួមមាន៖ នយោបាយ-សន្តិសុខ ការពារជាតិ កិច្ចការព្រំដែន ពាណិជ្ជកម្ម និងវិនិយោគ ការតភ្ជាប់ផ្លូវអាកាស ទេសចរណ៍ ថាមពល និងការអប់រំ។

សេចក្ដីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា ក្នុងកិច្ចសហប្រតិបត្តិការលើវិស័យអប់រំ នាយករដ្ឋមន្ត្រីទាំងពីរ បានជំរុញឲ្យភាគីទាំងពីរ បន្តធ្វើការផ្លាស់ប្តូរបញ្ញាវន្ត អ្នកស្រាវជ្រាវ បោះពុម្ពផ្សាយស្នាដៃស្រាវជ្រាវ និងចែក រំលែកចំណេះដឹង និងស្រាវជ្រាវរវាង រាជបណ្ឌិតសភាកម្ពុជា និងបណ្ឌិតសភាវិទ្យាសាស្ត្រសង្គមឡាវ។

បន្ថែមពីលើនេះ នាយករដ្ឋមន្ត្រីទាំងពីរ ក៏បានជំរុញឲ្យភាគីទាំងពីរពន្លឿន ការបញ្ចប់ការស្រាវជ្រាវរួមគ្នា ស្តីពី “ទំនាក់ទំនងកម្ពុជា-ឡាវ៖ ទំនាក់ទំនងប្រវត្តិសាស្ត្រ វប្បធម៌ និងប្រជាជននៅតាមព្រំដែននៃប្រទេសទាំងពីរ” និងការរៀបចំវចនានុក្រម ឡាវ-ខ្មែរ និងខ្មែរ-ឡាវ៕