​ផ្លូវកាត់ថ្មីពីកោះធំទៅស្រុកលើកដែក​គ្រោងបើកការដ្ឋាន​មុនចូលឆ្នាំខ្មែរ​

ផ្លូវថ្មីមួយខ្សែតភ្ជាប់ពី​ឃុំលើក​ដែក​ស្រុក​កោះ​ធំ ទៅ​ស្រុក​លើក​ដែកខេត្តកណ្តាល​នឹងត្រូវជំរុញបើកការដ្ឋានសាងសង់នៅមុនចូលឆ្នាំខ្មែរ។

លោក ស៊ុន ចាន់ថុល រដ្ឋមន្រ្តី​ក្រសួង​សាធារណការ​និង​ដឹក​ជញ្ជូនបានថ្លែងនៅថ្ងៃទី ១៥ ខែ កុម្ភៈ ឆ្នាំ ២០២៣នេះថា ផ្លូវលេខ ២៣ ជា​ផ្លូវ​ថ្មី​តភ្ជាប់ពី​ឃុំលើក​ដែក​ស្រុក​កោះ​ធំ ទៅ​ស្រុក​លើក​ដែកខេត្តកណ្តាលនឹងត្រូវជំរុញបើកការដ្ឋានឱ្យបានមុនចូលឆ្នាំខ្មែរ។

​ផ្លូវ​ថ្មី​លេខ ២៣ នេះ បងប្អូននៅឃុំលើកដែក​​ ស្រុកកោះធំ បើ​ចង់​ទៅលេង​អ្នកលឿង មិន​បាច់មក​ភ្នំពេញតាម​​ផ្លូវជាតិលេខ១ គឺអាចធ្វើ​ដំណើរ​ត្រង់​តាម​ផ្លូវលេខ ២៣ នេះតែម្តង។

សូមជំរាបថា ខេត្តកណ្តាល​​កំពុង​អភិវឌ្ឍ​ផ្លូវយុទ្ធសាស្រ្តថ្មីៗចំនួន ២ ខ្សែទៀត​។ ផ្លូវទី១ មានប្រវែង​បណ្តោយជាង ៧ គីឡូម៉ែត្រ ទទឹង ៦០ ម៉ែត្រ សាងសង់ចេញពីក្បែរច្រកទ្វារអន្តរជាតិក្អម​សំណស្រុកលើក​ដែកឆ្ពោះទៅស្រុកកោះធំ និង​ផ្លូវថ្មីមួយខ្សែទៀតមានប្រវែង ៣២ គីឡូម៉ែត្រ ទទឹង៥០ម៉ែត្រ ចេញពីស្រុកលើកដែក ឆ្ពោះទៅផ្លូវក្រវាត់ក្រុងទី៣ ឬចំណុចបំបែកផ្លូវលេខ១ ម្តុំខាងលិចស្ពានអ្នកលឿង៕