អភិបាលខេត្តប៉ៃលិន ជំរុញប្រជាកសិករដាំបន្លែបែបធម្មជាតិ ចៀសវាងការប្រើថ្នាំគីមីធ្វើឲ្យប៉ះពាល់ដល់សុខភាព

លោកស្រី បាន ស្រីមុំ អភិបាលនៃគណៈអភិបាលខេត្តប៉ៃលិន បានជំរុញលើកទឹកចិត្តដល់ប្រជាកសិករក្នុងសហគមន៍ឲ្យខិតខំដាំបន្លែបែបធម្មជាតិ ចៀសវាងការប្រើប្រាស់ថ្នាំគីមីដែលធ្វើឲ្យប៉ះពាល់ដល់សុខភាព ជាពិសេសដើម្បីផ្គត់ផ្គង់ជីវភាពក្នុងគ្រួសារ។

ថ្លែងនៅក្នុងឱកាសចុះពិនិត្យសកម្មភាពការដាំដុះបន្លែបែបធម្មជាតិរបស់ប្រជាកសិករនៅតាមបណ្តាសហគមន៍នានា ក្នុងស្រុកសាលាក្រៅ កាលពីព្រឹកថ្ងៃទី១៦ ខែកុម្ភៈ ឆ្នាំ២០២៣ នេះ លោកស្រី បាន ស្រីមុំ បានកោតសរសើរដល់ប្រជាពលរដ្ឋដែលបានដាំដុះបន្លែបែបធម្មជាតិ ដោយមិនប្រើសាធារធាតុគីមីដែលធ្វើឲ្យប៉ះពាល់សុខភាពដល់ដល់អ្នកទិញយកទៅបរិភោគប្រចាំថ្ងៃ។

លោកស្រីអភិបាលខេត្ត ក៏បានជំរុញ និងលើកទឹកចិត្តដល់ប្រជាកសិករក្នុងសហគមន៍នានា នៅក្នុងខេត្តប៉ៃលិនទាំងអស់ត្រូវបន្តខិតខំដាំបន្លែបែបធម្មជាតិឲ្យបានច្រើនបន្ថែមទៀត ដើម្បីនាំយកទៅលក់នៅលើទីផ្សារក្នុងភូមិ ឃុំ ស្រុក កាត់បន្ថយការនាំចូលបន្លែពីប្រទេសជិតខាង៕

អត្ថបទ៖ សេង សុវណ្ណារិទ្ធ