មន្ត្រីសុខាភិបាល ព្រមានយកស្រាពីរបីមុខលាយ​បញ្ចូលគ្នា អាច​ឱ្យពុលស្លាប់

មន្ត្រីជំនាញក្រសួងសុខាភិបាលបានអំពាវនាវដល់ប្រជាពលរដ្ឋ មិនត្រូវយកស្រាពីរទៅបីមុខលាយជាមួយភេសជ្ជៈផ្សេងៗបញ្ចូល​គ្នានោះទេ ព្រោះវាធ្វើឱ្យពុលប៉ះពាល់ដល់អាយុជីវិត។

ថ្លែងក្នុងពិធីដាក់ឱ្យប្រើប្រាស់កម្មវិធីរួមគ្នារវាងធនាគារជាតិនៃកម្ពុជា និងគណៈកម្មការចំពោះកិច្ចចាក់វ៉ាក់សាំងកូវីដ-១៩ ទូទាំង​ប្រទេសទៅលើកិច្ចសហប្រតិបត្តិការជាមួយគ្នា ក្នុងការប្រើប្រាស់តំណភ្ជាប់សម្រាប់ស្វែងរកមើលព័ត៌មានចាក់វ៉ាក់សាំង​កូវីដ-១៩ របស់សាមីបុគ្គលតាមរយៈប្រព័ន្ធបាគងនៅព្រឹកថ្ងៃទី ២០ កម្ភៈនេះ លោកស្រី វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស មានប្រសាសន៍ថា កន្លងមកមានករណីពុលស្រាស ដោយសារអ្នកបិទស្រា បានយកមេតាណុលទៅលាយដើម្បីឱ្យស្រាខ្លាំង ប៉ុន្តែមិនមានឧបករណ៍ដើម្បីវ៉ាស់កំហាប់មេតាណុល។ ដល់ពេលកំហាប់ច្រើនហួសកម្រិតបច្ចេកទេសពេលផឹកទៅបណ្តាឱ្យពុល ខ្លះអាចសង្គ្រោះបានខ្លះទៀតមិនអាចសង្គ្រោះបាន ដោយសារវាមានកំហាប់មេតាណុលខ្ពស់ពេក។

លោកស្រីវេជ្ជបណ្ឌិតបានបន្តថា «ឥឡូវមិនត្រឹមតដាក់មេតាណុលទៅលាយដោយគាត់យកស្រា ពីរបីមុខទៅលាយបញ្ចូលគ្នាមិនដឹងជាស្រាអ្វីនោះទេ ហើយយកភេសជ្ជៈណាផ្សេងទៀតដែលគាត់ថាខ្លាំងៗទៅលាយបញ្ចូលគ្នាទៀតហើយដល់ពេលគាត់ពិសារទៅត្រង់ជើងភ្លឹង វាឆ្ងាញ់តែត្រង់ជើងភ្លឹងពេទ្យជួយអត់ទាន់ព្រោះបើកាលណាកម្រិតពុលខ្លាំងអត់មានពីណាជួយទាន់ទេ។អីចឹងសូមចៀសវាងសូមមេត្តាពិសារដោយទទួលខុសត្រូវនិងជ្រើសរើសរកផលិតផលណាដែលមានការពិនិត្យត្រឹមត្រូវដើម្បសុខភាពរបស់ខ្លួនព្រោះថាស្លាប់ហើយអត់មានវិលវិញទេអាយុជីវិតមានតម្លៃណាស់»។

ទន្ទឹមនឹងនេះ លោកស្រីឱ វណ្ណឌីបានបន្ថែមថាក្រៅពីនេះដើម្បីសុខភាពល្អប្រជាពលរដ្ឋត្រូវចេះការពារនិងថែទាំសុខភាពឱ្យបានល្អអនុវត្តនូវគោលការណ៍អនាម័យស្អាតឱ្យបានខ្ជាប់ខ្ជួនដើម្បីការពារការឆ្លងជំងឺផ្សេងៗព្រោះថាបច្ចុប្បន្ននេះយើងរស់នៅជាមួយវត្តមានវីរុសជាច្រើនមិនថាមេរោគជំងឺកូវីដ១៩ទេរួមទាំងបាក់តេរីនិងមីក្រុមក៏មានដែរ។

លោកស្រី វេជ្ជបណ្ឌិត បានណែនាំដល់ប្រជាពលរដ្ឋសូមការពារខ្លួនកុំឱ្យឆ្លងជំងឺកូវីដ១៩ងឡើងវិញនិងគោរពច្បាប់ចរាចរណ៍ឱ្យបានត្រឹម ត្រូវបើពិសារគ្រឿងស្រវឹងសុំកុំបើកបរបើបើកបរកុំពិសារគ្រឿងស្រវឹងនិងកុំប្រើប្រាសើគ្រឿងញៀនធ្វើឱ្យខូចដល់សុខភាពរបស់យើង៕

អត្ថបទ៖ សំអឿន