លោកជំទាវ ម៉ែន សំអន ៖ ស្ត្រីគឺជាឆ្អឹងខ្នង នៃសេដ្ឋកិច្ច សង្គម តាមរយៈការចូលរួមចំណែកយ៉ាងសកម្ម ក្នុងកិច្ចអភិវឌ្ឍន៍ប្រទេសជាតិដែលមិនអាចខ្វះបាន

លោកជំទាវ​កិត្តិ​សង្គហ​បណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រី​ក្រសួង​ទំនាក់ទំនង​ជាមួយ​រដ្ឋ​សភា​-​ព្រឹទ្ធសភា និង​អធិការកិច្ច​ជា​អ្នកតំណាងរាស្ត្រ​មណ្ឌល​ស្វាយរៀង បាន​ថ្លែង​ថា ស្ត្រី​គឺជា​ឆ្អឹងខ្នង នៃ​សេដ្ឋកិច្ច សង្គម តាមរយៈ​ការ​ចូលរួម​ចំណែក​យ៉ាង​សកម្ម​ក្នុង​កិច្ច​អភិវឌ្ឍន៍​ប្រទេសជាតិ​ដែល​មិន​អាច​ខ្វះ​បាន​ឡើយ។ លោកជំទាវ​កិត្តិ​សង្គហ​បណ្ឌិត ម៉ែន សំអន ថ្លែង​បែបនេះ ខណៈ​អញ្ជើញ​ជួប​សំណេះសំណាល​ជាមួយ​នារី​នៅ​ក្រុង​បាវិត ខេត្ត​ស្វាយរៀង ដើម្បី​អបអរសាទរ ទិវា​អន្តរជាតិ​នារី ៨ មីនា ឆ្នាំ ២០២៣ ខួប​ទី ១១២ ក្រោម​មូលបទ «​ស្ត្រី​រួមគ្នា រក្សាសុខ សន្តិភាព ដើម្បី​កិច្ច​អភិវឌ្ឍន៍ ក្នុង​យុគសម័យ​ឌីជីថល​» កាលពី​រសៀល​ថ្ងៃ​ចន្ទ ១ កើត ខែផល្គុន ឆ្នាំខាល ចត្វា​ស័ក ព​.​ស​.២៥៦៦ ត្រូវ​នឹង​ថ្ងៃ​ទី ២០ ខែ​កុម្ភៈ ឆ្នាំ ២០២៣។

លោកជំទាវ​បាន​ពាំនាំ​ការ​ផ្ដាំផ្ញើ​សាកសួរ​សុខទុក្ខ​ពី​សំណាក់ សម្ដេច​អគ្គ​មហា​សេនា​បតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា ជូន​ដល់​សមាជិក សមាជិកា ដោយ​ក្ដី​នឹករលឹក និង​ការ​គិតគូរ​អំពី​សុខ​ទុក្ខ​ប្រជាពលរដ្ឋ​នៅ​ទូទាំង​ប្រទេស។

មាន​ប្រសាសន៍​សំណេះសំណាល​ក្នុង​ឱកាស​នោះ លោកជំទាវ​កិត្តិ​សង្គហ​បណ្ឌិត បាន​គូស​បញ្ជាក់​ថា ស្ត្រី​គឺជា​ឆ្អឹងខ្នង នៃ​សេដ្ឋកិច្ច សង្គម តាមរយៈ​ការ​ចូលរួម​ចំណែក​យ៉ាងសកម្ម​ក្នុង​កិច្ច​អភិវឌ្ឍន៍​ប្រទេសជាតិ។ បច្ចុប្បន្ន​ត្រូវ​បាន រាជរដ្ឋាភិបាល ក្រោម​ការ​ដឹកនាំ​ប្រកប​ដោយ​គតិបណ្ឌិត​របស់ សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា យកចិត្តទុកដាក់​ខ្ពស់ លើ​ការ​លើក​កម្ពស់​តម្លៃ​ស្ត្រី ផ្តល់​ឱកាស​ការងារ និង​អត្ថប្រយោជន៍​ដល់​ស្ត្រី​ពី​ថ្នាក់​ជាតិ រហូតដល់​ថ្នាក់ក្រោម​ជាតិ សំដៅ​ធ្វើ​យ៉ាង​ណា​ឲ្យ​មាន​ការ​ចូលរួម​កាន់តែ​ច្រើន និង​ប្រកបដោយ​គុណភាព ប្រសិទ្ធភាព​ការងារ ក្នុង​កិច្ច​ដំណើរការ​អភិវឌ្ឍ​សង្គម និង​សេដ្ឋកិច្ច​ជាតិ។

ជា​ចុងក្រោយ លោកជំទាវ ក៏បាន​នាំ​យក​នូវ​អំណោយ​រួមមាន ៖ ស៊ឹង ១ ក្រមា ១ និង​ថវិកា ២ ម៉ឺន​រៀល ចែក​ជូន​ដល់​បងប្អូន​នារី​ដែល​បាន​ចូលរួម​កម្មវិធី​ក្នុង​ថ្ងៃនេះ​ផង​ដែរ៕

អត្ថបទ ៖ វិមាន