ចង់ទៅលេងតំបន់ទេសចរណ៍ខេត្តកោះកុង​ឆ្នាំនេះ​គួរទៅកន្លែងណា?

ខេត្តកោះកុង មាន​តំបន់​ទេសចរណ៍​ជាច្រើន​ ដែល​ប្រជាពលរដ្ឋ​នៅក្នុង​ខេត្ត​នេះ និង​មកពី​ខេត្ត​ក្រុង​ផ្សេងៗ​ទៀត​និយម​ទៅ​លេង​កម្សាន្ត។ កោះកុងជាខេត្តអេកូទេសចរណ៍តំបន់ឆ្នេរ ដែលអំណោយផលដល់ការដកដង្ហើម ខ្យល់បរិសុទ្ធ។

សម្រាប់ឱកាសបុណ្យចូលឆ្នាំថ្មីប្រពៃណីជាតិនាពេលខាងមុខនេះ ដោយសារផ្លូវ ៤៨ កំពុងស្ថាបនា​ដូច្នេះមានការលំបាកខ្លះចំពោះបងប្អូន​ចង់ទៅដល់តំបន់ទេសចរណ៍​នៅក្នុងក្រុងខេមរភូមិន្ទ ស្រុកថ្មបាំងក៏មានការលំបាកតិចតួច ហេតុនេះបងប្អូន​​អាចទៅលេងបាន ប៉ុន្តែជាចម្បងបងប្អូនទេសចរអាចទៅលេងស្រុកស្រែអំបិល។

ការធ្វើដំណើរទៅស្រុកស្រែអំបិលតាមផ្លូវល្បឿនលឿនចុះតាមច្រកកំពង់សិលាចេញទៅប្រមាណ ៦ គីឡូទៅដល់ស្រុកស្រែអំបិល។ ពេលទៅដល់ស្រុកស្រែអំបិល​យើងអាចទៅលេងតំបន់ទេសចរណ៍ស្ទឹងពពក, រមណីយដ្ឋានឆ្នេរកោងកាង, រមណីយដ្ឋាន​ឆ្នេរនេសាទ​ និងតាមរមណីយដ្ឋានផ្សេងៗ នៅតាមបណ្ដោយព្រែកស្រែអំបិល។

ចំពោះតំបន់ស្ទឹងពពកទេសចរអាចទៅបោះតង់ ជិះកង់លេងតាមដងព្រៃ ទៅលេងទឹកជ្រោះ ដែលសុទ្ធតែជាសក្ដានុពលសម្រាប់ទេសចរចង់ទៅលេងកម្សាន្តនៅខេត្តកោះកុង។

លោក សុខ ច័ន្ទគ្រឹះស្នា ប្រធានមន្ទីរទេសចរណ៍ ខេត្តកោះកុងសង្ឃឹមថា ទេសចរនឹងកើនឡើងដល់ ៥០ ម៉ឺននាក់ នៅពេលដែលផ្លូវ​ ៤៨ និងផ្លូវជាតិលេខ ១០ សាងសង់រួចរាល់ ដែលជាអំណោយផលដល់ប្រជាពលរដ្ឋប្រកបរបរក្នុងវិស័យទេសចរអាចរកចំណូលបានច្រើន។

នៅក្នុងឆ្នាំ ២០២២ ទេសចរទៅលេងខេត្តកោះកុងបានកើនឡើងវិញដល់ ៤០ ម៉ឺននាក់ បន្ទាប់ពីកូវីដ១៩ ធូរស្រាល៕

អត្ថបទ៖ ឡេង ដេត