កម្ពុជា កំពុងរង់ចាំមើលសេចក្ដីថ្លែងការណ៍របស់បណ្ដាប្រទេសនានា ពាក់ព័ន្ធនឹងខួប ១ឆ្នាំ នៃការលុកលុយរបស់រុស្ស៊ីចូលអ៊ុយក្រែន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ប្រទេសកម្ពុជា កំពុងរង់ចាំមើលសេចក្ដីថ្លែងការណ៍របស់បណ្ដាប្រទេសនានា ពាក់ព័ន្ធនឹងខួប ១ឆ្នាំ នៃការលុកលុយរបស់ប្រទេសរុស្ស៊ីចូលទៅកាន់ប្រទេសអ៊ុយក្រែន។

នៅក្នុងពិធីប្រគល់សញ្ញាបត្រជូននិស្សិត​សាកលវិទ្យាល័យ​ភូមិន្ទភ្នំពេញជាង ៧ពាន់នាក់ នាព្រឹកថ្ងៃទី ២៤ ខែកុម្ភៈនេះ សម្ដេចតេជោ ហ៊ុន សែន បានថ្លែងថា នៅថ្ងៃនេះ គឺជាខួប ១ឆ្នាំ ដែលប្រទេសរុស្ស៊ីបញ្ជូនកងទ័ពចូលលុកលុយប្រទេសអ៊ុយក្រែន ហើយកម្ពុជានឹងរង់ចាំមើលបណ្ដាប្រទេសនានា ថាតើប្រទេសណាខ្លះ ចេញសេចក្ដីថ្លែងការណ៍បែបណាខ្លះ?

សម្ដេចតេជោ ហ៊ុន សែន បានថ្លែងបែបនេះថា «ហើយនេះ ក៏ខួបលើកទី ១ឆ្នាំ នៃការដែលរុស្ស៊ីនាំកងទ័ពចូលទៅកាន់អ៊ុយក្រែន ហើយតាមរយៈនោះ គឺថ្ងៃនេះយើងរង់ចាំមើលបណ្ដាប្រទេសនានា តើគេប្រទេសណាខ្លះធ្វើសេចក្ដីថ្លែងការណ៍របៀបណាខ្លះ របៀបម៉េច»?

សម្ដេចតេជោ ហ៊ុន សែន បានបញ្ជាក់ថា សម្រាប់សង្រ្គាមរុស្ស៊ី-អ៊ុយក្រែន នេះ ប្រទេសកម្ពុជា កំពុងរង់ចាំមើលសេចក្ដីថ្លែងការណ៍របស់ប្រទេសមហាអំណាចនានា ហើយបញ្ហារុស្ស៊ី-អ៊ុយក្រែន នេះ មានភាពស្មុគស្មាញជាខ្លាំង៕