ព័ត៌មានជាតិ

ក្រសួងអប់រំ ប្រកាសកាលបរិច្ឆេទប្រឡងឌីប្លូមនៅថ្ងៃទី ២ តុលា និងប្រឡងបាក់ឌុបនៅថ្ងៃ ៦ វិច្ឆិកា

បានផុស

២ years មុន

នៅ

ថ្ងៃសុក្រ ២៤ កុម្ភៈ ២០២៣

ដោយ

ក្រសួងអប់រំ យុវជន និងកីឡា បានប្រកាសកាលបរិច្ឆេទ នៃការប្រឡងសញ្ញាបត្រមធ្យមសិក្សាបឋមភូមិ ឬឌីប្លូម នៅថ្ងៃទី ២ ខែតុលា និងប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅថ្ងៃទី ៦ ខែវិច្ឆិកា ឆ្នាំ ២០២៣ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឲ្យដឹងនៅក្នុងសេចក្ដីជូនដំណឹងមួយដែលទើបទទួលបាននៅថ្ងៃទី ២៤ កុម្ភៈនេះថា សម្រាប់ឆ្នាំសិក្សា ២០២២-២០២៣ នេះ ក្រសួងបានកំណត់កាលបរិច្ឆេទ នៃការប្រឡងសញ្ញាបត្រមធ្យមសិក្សាបឋមភូមិនៅថ្ងៃទី ២ ខែតុលា ឆ្នាំ ២០២៣ និងប្រកាសលទ្ធផលនៅថ្ងៃទី ៩ ខែវិច្ឆិកា ឆ្នាំ ២០២៣។ ចំណែកប្រឡងសញ្ញាបត្រមធ្យមសិក្សាទុតិយភូមិវិញ ក្រសួង នឹងរៀបចំការប្រឡងនៅថ្ងៃទី ៦ ខែវិច្ឆិកា ឆ្នាំ ២០២៣ និងប្រកាសលទ្ធផលនៅថ្ងៃទី ២៩ ខែវិច្ឆិកា ឆ្នាំ ២០២៣។

លោករដ្ឋមន្ត្រីបានបន្តថា ចំពោះការប្រឡងឆមាសលើកទី ១ សម្រាប់ប្រឡងឌីប្លូម ក្រសួងបានណែនាំឲ្យសាលានីមួយៗរៀបចំប្រឡងនៅថ្ងៃទី ២៩ ខែឧសភា ដល់ថ្ងៃទី ៣ ខែមិថុនា ឆ្នាំ ២០២៣ និងប្រឡងឆមាសលើកទី ២ ប្រឡងនៅថ្ងៃទី ១១ ដល់ថ្ងៃទី ១៦ ខែកញ្ញា ឆ្នាំ ២០២៣។

លោករដ្ឋមន្ត្រីបានបន្តទៀតថា រីឯការប្រឡងឆមាសលើកទី ១ សម្រាប់សិស្សថ្នាក់ទី ១២ ក្រសួងបានឲ្យសាលារៀបចំប្រឡងចាប់ពីថ្ងៃទី ២២ ដល់ថ្ងៃ ២៧ ខែឧសភា ឆ្នាំ ២០២៣ និងប្រឡងឆមាសលើកទី ២ ចាប់ពីថ្ងៃទី ២១ ដល់ថ្ងៃទី ២៦ ខែសីហា ឆ្នាំ ២០២៣។

គួរបញ្ជាក់ថា សម្រាប់ឆ្នាំសិក្សា ២០២១-២០២២ កន្លងទៅ ក្រសួងអប់រំ យុវជន និងកីឡា បានរៀបចំការប្រឡងសញ្ញាបត្រមធ្យមសិក្សាបឋមភូមិនៅថ្ងៃទី ២៤ ខែវិច្ឆិកា ឆ្នាំ ២០២២ ខណៈការប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី ០៥ ខែធ្នូ ឆ្នាំ ២០២២៕

អត្ថបទ ៖ សំអឿន

Related Topics:ប្រឡងបាក់ឌុប