ក្រសួងការបរទេសនឹងរៀបចំសន្និបាតប្រចាំឆ្នាំ ដើម្បីពិនិត្យលើការងារការទូត

ក្រសួងការបរទេស និងសហប្រតិបត្តិការអន្តរជាតិ នឹងរៀបចំសន្និបាតប្រចាំឆ្នាំ ចាប់ពីថ្ងៃទី១ ដល់ថ្ងៃទី៣ ខែមីនា ឆ្នាំ ២០២៣ ដើម្បីពិនិត្យ និងវាយតម្លៃលើសមិទ្ធផលការងារការទូត និងការរៀបចំនូវផែនការសកម្មភាពថ្មីសម្រាប់គោលនយោបាយការបរទេស ឯករាជ្យ និងផ្អែកតាមច្បាប់។

សន្និបាតប្រចាំរបស់ក្រសួងការបរទេសកម្ពុជានឹងមានការចូលរួមពីថ្នាក់ដឹកនាំ មន្រ្តីរាជការក្រសួង ប្រធានស្ថានតំណាងកម្ពុជានៅបរទេស និងតំណាងជាន់ខ្ពស់ពីស្ថាប័នជាតិពាក់ព័ន្ធ។  

លោកឧបនាយករដ្ឋមន្ត្រី ប្រាក់ សុខុន ដែលជារដ្ឋមន្ត្រីការបរទេស និងសហប្រតិបត្តិការអន្តរជាតិ នឹងអញ្ជើញជាអធិបតីក្នុងពិធីបើកសន្និបាត និងធ្វើជាប្រធានដឹកនាំកិច្ចពិភាក្សារយៈពេលពីរថ្ងៃដំបូង។

ប្រធានបទដែលត្រូវលើមកពិភាក្សា រួមមាន ការប្រែប្រួលភូមិសាស្ត្រនយោបាយសកល ការវិវត្តនៃបញ្ហាក្នុងតំបន់ដែលជាផលប្រយោជន៍ និងក្តីបារម្ភរបស់កម្ពុជា យុទ្ធសាស្ត្រការទូតសេដ្ឋកិច្ចក្នុងបរិបទនៃការធ្លាក់ចុះសេដ្ឋកិច្ចសកល ក៏ដូចជាការបន្តធ្វើកំណែទម្រង់ស្ថាប័ន ជាដើម។

ទន្ទឹមនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏នឹងអញ្ជើញជាអធិបតីក្នុងពិធីបិទសន្និបាតដែលនឹងរៀបចំជាលក្ខណៈផ្ទៃក្នុង នៅថ្ងៃទី៣ ខែមីនា ឆ្នាំ២០២៣។

ក្នុងឱកាសនោះ សម្តេចតេជោនាយករដ្ឋមន្ត្រី នឹងផ្ដល់គោលការណ៍ណែនាំ និងទិសដៅគោលនយោបាយដល់មន្ត្រីការទូតកម្ពុជាទាំងអស់សំដៅរក្សាផលប្រយោជន៍ស្នូលរបស់កម្ពុជា ដើម្បីធានាឲ្យបានអធិបតេយ្យភាព និងសន្តិភាព ព្រមទាំងជំរុញទំនាក់ទំនងសេដ្ឋកិច្ច៕

ដោយ៖ ធឿន វ៉ាន់សុង