ខេត្តស្វាយរៀង មានឱសថស្ថាន និងឱសថស្ថានរង​ចំនួន៥៣កន្លែង

លោក អៀ ចន្ទ័និមល ប្រធានក្រុមប្រឹក្សាគណៈឱសថការីខេត្តស្វាយរៀង បានបញ្ជាក់ បានលើកឡើងថា នៅក្នុង​ខេត្តស្វាយរៀងមានឱសថស្ថាន និងឱសថស្ថានរងសរុបចំនួន៥៣កន្លែង ក្នុងនោះឱសថស្ថានចំនួន៤៤កន្លែង គ្រប់គ្រងដោយឱសថការីឧត្តម និងឱសថស្ថានរង ក ចំនួន៨កន្លែង គ្រប់គ្រងដោយឪសថការីមធ្យម និងឱសថការី​ឱសថស្ថានរង ខ ចំនួន១កន្លែង គ្រប់គ្រងដោយមន្ត្រីសុខាភិបាលចូលនិវត្ត។  កន្លងមកគណៈ​ឱសថការីខេត្ត​បានធ្វើការចេញ​អាជ្ញាប័ណ្ណដល់ឱសថការីដំបូងជូនសមាជិកគណៈឱសថការីបានចំនួន៦៥នាក់ និងបន្តអាជ្ញា​ប័ណ្ណឱសថការីបាន៣៩នាក់។ លោកថ្លែងបែបនេះ នៅក្នុងសន្និបាតបូកសរុបលទ្ធផលការងារ​ក្រុមប្រឹក្សាគណៈឱសថកា​រីខេត្ត​អាណត្តិទី២ និងទិសដៅ ការងារបោះឆ្នោតជ្រើសរើសក្រុមប្រឹក្សាគណៈឱសថការីខេត្តស្វាយរៀង អាណត្តិទី៣ កាលពីថ្ងៃទី ២៧ កុម្ភៈ។

លោក អៀ ចន្ទ័និមល បានបន្ថែមថា កន្លងមក គណៈឱសថការីខេត្តស្វាយរៀង បានដើរតួនាទីជានគរបាលយុត្តិធម៌​ក្នុងការចុះបង្ក្រាបឱសថក្លែងក្លាយ ឱសថហួសកាលបរិច្ឆេទនៅតាមឱសថស្ថាន ឱសថស្ថានរងនានា និងមានការគាំទ្រពី​ប្រជាពលរដ្ឋយ៉ាងច្រើនកុះករ។

មានប្រសាសន៍នៅក្នុងសន្និបាតនេះដែរលោក បាន បុត្តា អនុរដ្ឋលេខាធិការក្រសួងសុខាភិបាល និងជាប្រធាន​ក្រុមប្រឹក្សា​គណៈឱសថការីជាតិបានថ្លែងកោតសរសើរដល់មន្ទីរសុខាភិបាលខេត្ត ពិសេសក្រុមប្រឹក្សាគណៈឱសថការី​ខេត្តស្វាយ​រៀង ដែលបានរួមសហការជាមួយអាជ្ញាធរដែនដីមូលដ្ឋាននានា ក្នុងខេត្តស្វាយរៀង ដើម្បីចុះបង្ក្រាប​និងលុបបំបាត់​ឱសថក្លែង​ក្លាយនៅតាមឱសថស្ថាន ព្រមទាំងធ្វើការអប់រំផ្សព្វផ្សាយដល់ឪសថការីក្នុងការធ្វើអាជីវកម្មវិស័យ​សុខាភិបាល​ត្រូវ​មានអាជ្ញាប័ណ្ណច្បាស់លាស់។

លោកក៏បានធ្វើការផ្ដាំផ្ញើដល់ឱសថការីដែលបានបើកឱសថស្ថាននានានៅគ្រប់ទីកន្លែងក្នុងខេត្តស្វាយរៀង ត្រូវមាន​អាជ្ញាប័ណ្ណត្រឹមត្រូវ ហើយចំពោះឪសថការីណាពុំទាន់មានអាជ្ញាប័ណ្ណត្រូវធ្វើអាជ្ញាបណ្ណ ព្រមទាំងរួមគ្នាលុបបំបាត់​នូវឪសថក្លែងក្លាយដែលឪសថក្លែងក្លាយធ្វើឲ្យប៉ះពាល់សុខភាពដល់អ្នកទៅទិញឱសថយកទៅប្រើប្រាស់៕

ដោយ:ភក្ដី