រដ្ឋមន្ត្រីក្រសួងសុខាភិបាល អញ្ជើញសម្ពោធអគារថ្មី នៃមន្ទីរពេទ្យបង្អែកខេត្តឧត្តរមានជ័យ

សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញជាអធិបតីភាពក្នុងពិធីសម្ពោធដាក់ឱ្យដំណើរការអគារថ្មី នៃមន្ទីរពេទ្យបង្អែកខេត្តឧត្តរមានជ័យ នៅថ្ងៃទី១ ខែមីនា ឆ្នាំ២០២៣នេះ។

ពិធីសម្ពោធនេះ មានការអញ្ជើញចូលរួមពី លោកស្រី យក់ សម្បត្តិ រដ្ឋលេខាធិការប្រចាំការ ក្រសួងសុខាភិបាល ប្រធានក្រុមប្រឹក្សាខេត្ត អភិបាលនៃគណៈអភិបាលខេត្ត ព្រមទាំង ថ្នាក់ដឹកដឹកនាំក្រសួងសុខាភិបាល ប្រធានមន្ទីរសុខាភិបាលនៃរដ្ឋបាលខេត្ត ព្រមទាំង មន្តី្ររាជការ កងកម្លាំងប្រដាប់អាវុធ ក្មួយៗសិស្សានុសិស្ស និងបងប្អូនប្រជាពលរដ្ឋ នៅក្នុងខេត្តឧត្តរមានជ័យ។

សាស្ត្រាចារ្យ ម៉ម ប៊ុនហេង បានពាំនាំនូវការសាកសួរសុខទុក្ខ និងក្តីនឹករលឹកពីសំណាក់ សម្តេចតេជោ ហ៊ុន សែន នាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត ប៊ុនរ៉ានីហ៊ុន សែន ប្រគេនព្រះថេរានុត្ថេរៈគ្រប់ព្រះអង្គ ជូនចំពោះ លោក លោកស្រី ថ្នាក់ដឹកនាំខេត្ត មន្ត្រីរាជការ បុគ្គលិក មន្ទីរជុំវិញខេត្ត កងកម្លាំងប្រដាប់អាវុធ ក្មួយៗសិស្សានុសិស្ស និងបងប្អូនប្រជាពលរដ្ឋទាំងអស់ នៅក្នុងខេត្តឧត្តរមានជ័យ។

គួរបញ្ជាក់ថា ដោយមើលឃើញពីភាពខ្វះខាត និងតម្រូវការជាក់ស្តែង នៃមូលដ្ឋានផ្តល់សេវាសុខាភិបាល ឱ្យកាន់តែមានគុណភាពបន្ថែមទៀត មន្ទីរសុខាភិបាលខេត្តឧត្ដរមានជ័យ បានទទួលការសាងសង់អគារថ្មីនៃមន្ទីរពេទ្យខេត្ត ក្នុងគម្រោង H.EQIP ដែលមានទំហំ ៣៣ គុណ ៤២ម៉ែត្រ សរុបជាទឹកប្រាក់ប្រមាណ ១ ៧៤៩ ២៩៦ ដុល្លារ។ គម្រោងសាងសង់នេះត្រូវបានទទួលការម៉ៅការដោយក្រុមហ៊ុន Y-VAN Service Co.LTD ដែលមានរយៈពេលសាងសង់ ១៦ខែ ចាប់ពីពាក់កណ្ដាលខែកក្កដា ឆ្នាំ២០២០។ អគារនេះមានកម្ពស់ ២ជាន់ ស្តង់ដារមន្ទីរពេទ្យកម្រិត៣ (CPA III) មានគ្រែ ១៧០ និងបំពាក់សម្ភារបរិក្ខាមួយចំនួនទៀត៕