រដ្ឋបាលក្រុងបាវិត ពន្លឿនសាងសង់ផ្លូវបេតុងមួយខ្សែ បម្រើផលប្រយោជន៍កសិករ និងបញ្ចៀសការកកស្ទះ

(ខេត្តស្វាយរៀង)៖ ផ្លូវចាក់បេតុងអាម៉េមួយខ្សែប្រវែងជិត៨០០ម៉ែត្រ ភ្ជាប់ពីផ្លូវជាតិលេខ១  ឆ្ពោះទៅកាន់រមណីយដ្ឋាន​ទួលយាយដូន និងតំបន់បន្ទាត់ព្រំដែន ដើម្បីបញ្ចៀសការកកស្ទះចរាចរណ៍។

លោក លឹម សៀងហេង អភិបាលក្រុងបាវិត នៅព្រឹកថ្ងៃទី១ ខែមីនា ឆ្នាំ២០២៣ បានលើកឡើងថា បច្ចុប្បន្នកម្ពុជា​មានការ​អភិវឌ្ឍរីកចម្រើនស្ទើរគ្រប់វិស័យ ហើយផ្លូវថ្នល់គឺជាសរសៃឈាមសេដ្ឋកិច្ច ។ ចំពោះក្រុងបាវិត ខេត្តស្វាយ​រៀងវិញ ក៏មានការអភិវឌ្ឍ និងរីកចម្រើនផងដែរ ជាពិសេសគឺកំណើនប្រជាពលរដ្ឋធ្វើចរាចរណ៍​ទៅមកមានសភាព​មមារញឹកជាងមុននាពេលបច្ចុប្បន្ន។

លោកអភិបាលក្រុងបាវិត បានបន្តទៀតថា ផ្លូវចាក់បេតុងអាម៉េមួយខ្សែប្រវែងជិត៨០០ម៉ែត្រ​ទទឹង៨ម៉ែត្រកម្រាស់១.៥​តឹកនេះ គឺមានដាក់លូនិងស្តារប្រឡាយដើម្បីរំដោះទឹកភ្លៀងនារដូវវស្សា ពីភូមិដ្ឋានរបស់ប្រជាពលរដ្ឋ ដែលជាការ​ផ្តួចផ្តើមគិតគូរស្ថាបនាពីសំណាក់ លោក ម៉ែន វិបុល អភិបាលខេត្តស្វាយរៀង ដោយប្រើថវិកា​គុណប្រយោជន៍ខេត្ត ក្នុងការស្ថាបនាដើម្បីសម្រួលក្នុងការធ្វើដំណើរដឹកកសិផលរបស់បងប្អូនប្រជាពលរដ្ឋ ក៏ដូចជាបញ្ចៀសសការកកស្ទះ​ចរាចរណ៍បានមួយកម្រិតទៀត។

លោកអភិបាលក្រុងបាវិត ក៏បានអំពាវនាវសូមឲ្យបងប្អូនប្រជាពលរដ្ឋទាំងអស់នៅពេលផ្លូវស្ថាបនារួចរាល់សូមជួយ​ថែរក្សា​ឱ្យបានគង់វង្សយូរអង្វែង៕

ដោយ:ភក្ដី