ព័ត៌មានជាតិ
មន្ត្រីនគរបាល បញ្ជាក់មូលហេតុនាំឲ្យកកស្ទះចរាចរណ៍ខ្លាំង តាមកំណាត់ផ្លូវឆ្ពោះទៅស្ពានអាកាសក្បាលថ្នល់
ក្នុងរយៈពេលចុងក្រោយនេះ ជាពិសេសនៅយប់ថ្ងៃទី ១ ខែមីនា ឆ្នាំ ២០២៣តែម្ដង មានការកកស្ទះចរាចរណ៍ខ្លាំង នៅតាមកំណាត់ផ្លូវមួយចំនួន ឆ្ពោះទៅស្ពានអាកាសក្បាលថ្នល់។ បញ្ហានេះ មន្ត្រីនគរបាលរាជធានីភ្នំពេញ បានឲ្យដឹងថា បញ្ហានៃការកកស្ទះចរាចរណ៍នេះ គឺដោយសារតែអាជ្ញាធររាជធានីភ្នំពេញ ចាប់ផ្ដើមសាងសង់ស្ពានអាកាសផ្លូវ ៦០ ម៉ែត្រ និងដោយសារតែកំណើនយានយន្ដ ដែលធ្វើដំណើរឆ្លងកាត់ផ្លូវទាំងនោះ ផងដែរ។

លោកឧត្ដមសេនីយ៍ត្រី សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានឲ្យដឹងនៅថ្ងៃទី ២ ខែមីនានេះថា មូលហេតុចម្បង ដែលនាំឲ្យមានការកកស្ទះចរាចរណ៍ខ្លាំង នារយៈពេលចុងក្រោយនេះ ជាពិសេសនាយប់ថ្ងៃទី ១ ខែមីនា ត្រង់កំណាត់ផ្លូវព្រះមុនីវង្ស ឆ្ពោះទៅស្ពានអាកាសក្បាលថ្នល់ និងម្ដុំស្ដុបបូកគោ ជាដើមនោះ ក៏ព្រោះតែអាជ្ញាធររាជធានីភ្នំពេញ ចាប់ផ្ដើមសាងសង់ស្ពានអាកាសផ្លូវ ៦០ ម៉ែត្រ ដែលមានទីតាំងប្រសព្វរវាងមហាវិថីសម្តេចអគ្គមហាសេនាបតីតេជោ ហ៊ុន សែន មហាវិថីព្រះមុនីវង្ស និងវិថីកងយោធពលខេមរភូមិន្ទ (ផ្លូវលេខ ២៧១)។

ម្យ៉ាងទៀត ដោយសារប្រទេសជាតិ មានសុខសន្តិភាព មានការអភិវឌ្ឍស្ទើរគ្រប់ទីកន្លែង ជាពិសេសនៅរាជធានីភ្នំពេញ ហើយតំបន់មានការកកស្ទះចរាចរណ៍ខ្លាំងខាងលើនេះ ក៏ដោយមានកំណើននៃការសាងសង់ បុរី ខុនដូ និងផ្សារទំនើបជាដើម ដែលនាំឲ្យមានធ្វើចរាចរណ៍យានយន្ដ នៅតំបន់នោះច្រើន។

លោកឧត្ដមសេនីយ៍ត្រី សាន សុខសីហា មានប្រសាសន៍បែបនេះថា «បញ្ហាកកស្ទះនេះ ទីមួយ ដែលជាបញ្ហាចម្បង គឺទាក់ទងទៅនឹងការកសាងស្ពានអាកាស នៅម្ដុំច្រមុះជ្រូកក្បាលថ្នល់ហ្នឹង អញ្ចឹងយើងឃើញថា ក្នុងរយៈពេលនៃការធ្វើការដ្ឋាន គឺវាពិតជាធ្វើឲ្យមានការកកស្ទះច្រើន ហើយម្យ៉ាងវិញទៀតចំនួនយានយន្ដនៅរាជធានីភ្នំពេញចេះតែកើនឡើង ក៏កត្តាមួយនាំឲ្យមានការកកស្ទះដែរ តែបញ្ហាចំបងគឺដោយសារតែមានការដ្ឋានសាងសង់ស្ពានអាកាស នៅម្ដុំច្រមុះជ្រូកក្បាលថ្នល់»។

តែយ៉ាងណាក៏ដោយ នៅតាមគោលដៅដែលមានការកកស្ទះចរាចរណ៍នោះ គឺកម្លាំងសមត្ថកិច្ចរាជធានីភ្នំពេញ បានដាក់កម្លាំងដើម្បីសម្រួលចរាចរណ៍ កុំឲ្យមានការកកស្ទះខ្លាំង។ លោកឧត្ដមសេនីយ៍ត្រី សាន សុខសីហា ឲ្យដឹងបែបនេះថា «គ្រប់គោលដៅទាំងអស់ ដែលបានលើកឡើងនេះ គឺគ្រប់ពេល ទាំងពេលព្រឹក ពេលថ្ងៃ និងពេលល្ងាច គឺសមត្ថកិច្ចមន្ត្រីចរាចរណ៍ នៃស្នងការដ្ឋាននគរបាលរាជធានីភ្នំពេញ ក៏ដូចជាតាមបណ្ដាខណ្ឌ ប៉ុស្ដិ៍ គឺតែងតែចេញមកជួយសម្រួលគ្នា ដើម្បីកុំឲ្យមានការកកស្ទះខ្លាំង»។

ក្នុងនោះដែរ លោកឧត្ដមសេនីយ៍ត្រី ក្នុងនាមស្នងការដ្ឋាននគរបាលរាជធានីភ្នំពេញ សំណូមពរដល់អ្នកបើកបរយានយន្តទាំងអស់ ប្រសិនបើកំពុងមានការកកស្ទះចរាចរណ៍ដូចនោះហើយ សូមបើកបរដោយគោរពច្បាប់ គោរពសិទ្ធិអាទិភាព និងគោរពភ្លើងសញ្ញា និងគំនូសសញ្ជា ជាដើម ដើម្បីអាចជួយសម្រួលការកកស្ទះចរាចរណ៍បានខ្លះដែរ។
អ្នកនាំពាក្យនគរបាលរាជធានីភ្នំពេញរូបនេះ បានស្នើសុំឲ្យប្រជាពលរដ្ឋមានការយោគយល់ ចំពោះបញ្ហានៃការកកស្ទះចរាចរណ៍នេះ ពីព្រោះនេះជាការអភិវឌ្ឍ ហើយនៅពេលសាងសង់ស្ពានអាកាសនេះរួច នឹងធ្វើឲ្យការធ្វើចរាចរណ៍មានភាពល្អប្រសើរឡើងវិញ។
ជាការកត់សម្គាល់ រាជរដ្ឋាភិបាល ក្រសួង-ស្ថាប័នពាក់ព័ន្ធ ជាពិសេសរដ្ឋបាលរាជធានីភ្នំពេញ តែងតែគិតគូរស្វែងរកដំណោះស្រាយ ចំពោះបញ្ហានៃការកកស្ទះចរាចរណ៍នេះ ដោយមានការស្ថាបនាពង្រីកផ្លូវ, ការកសាងស្ពានអាកាស និងការរៀបចំសណ្ដាប់ធ្នាប់តាមបណ្ដាផ្លូវនានា ជាដើម៕

-
ព័ត៌មានអន្ដរជាតិ១ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម៣ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៥ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ២ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៥ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៦ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម១ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
សន្តិសុខសង្គម១៤ ម៉ោង ago
ជនសង្ស័យប្លន់រថយន្តលើផ្លូវល្បឿនលឿន ត្រូវសមត្ថកិច្ចស្រុកអង្គស្នួលឃាត់ខ្លួនបានហើយ