សម្ដេចតេជោ ណែនាំឲ្យយកចិត្តទុកដាក់ចំពោះការកសាងរូបសំណាក ឬបដិមា ដែលត្រូវធ្វើឲ្យបានត្រឹមត្រូវតាមរចនាបឋ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំឲ្យក្រសួងវប្បធម៌ និងវិចិត្រសិល្បៈ និងក្រសួង-ស្ថាប័នពាក់ព័ន្ធនានា ត្រូវយកចិត្តទុកដាក់ចំពោះការកសាងរូបសំណាក ឬបដិមា ដែលទាម​ទារត្រូវធ្វើឲ្យបានត្រឹមត្រូវតាមរចនាបឋ។

នៅក្នុងពិធីអបអរសាទរទិវាវប្បធម៌ជាតិ ៣មីនា លើកទី ២៥ និងពិសាអាហារសាមគ្គីជាមួយសិល្បករ-សិល្បការិនីប្រមាណជាង ៤០០០នាក់ នៅល្ងាចថ្ងៃទី ២ ខែមីនានេះ សម្ដេចតេជោ ហ៊ុន សែន លើកឡើងថា ប្រសិនបើការកសាងរូបសំណាក ឬបដិមានោះ មិនត្រឹមត្រូវតាមក្បួនខ្នាតទេ នៅពេលអភិ​សេកដាក់ឲ្យប្រើប្រាស់រួចរាល់ មិនមាននរណាហ៊ានវាយចោលនោះទេ ដោយខ្លាចមានបញ្ហាគ្រោះថ្នាក់តាមអបិយជំនឿ។

សម្ដេចតេជោ ហ៊ុន សែន ថ្លែងបែបនេះថា «អញ្ចឹងទេ របស់នោះ (រូបសំណាក ឬបដិមា) បានបន្សល់ទុករាប់រយឆ្នាំ ទៅខាងមុខទៀត ដែលនាំទៅឲ្យក្មេងជំនាន់ក្រោយ អាចយល់ខុសអំពីទម្រង់ខ្មែរពិតប្រាកដយ៉ាងណា យើងគ្រាន់តែបញ្ហាទាក់ទិនជាមួយនឹងរូបបដិមា អីជាដើម ឬក៏រូបសំណាកស្អីៗនេះ តែចេញឡើងគឺពេលដែលអភិសេកហើយ អត់មានអ្នកណាទៅប៉ះពាល់បានទេ អញ្ចឹងរូបនេះគឺបន្សល់ទុកមួយរយ ពីររយឆ្នាំ លើកលែងតែអាពតទេ ដែលវាវាយចោលនោះ ហើយក្រៅពីនោះអត់នរណាហ៊ានវាយទេ»។

សម្ដេចតេជោ ហ៊ុន សែន បានស្នើឲ្យក្រសួងវប្បធម៌ និងវិចិត្រសិល្បៈ ត្រូវយកចិត្តទុកដាក់ទៅលើចំណុចនេះ។ ក្នុងចំណុចនេះដែរ សម្ដេចតេជោ ហ៊ុន សែន បានសម្រេចរួចហើយថា ក្នុងចំណោម ១លាន ៥សែននាក់ នៃសិស្សដែលត្រូវទទួលបាននូវការបណ្ដុះបណ្ដាល គឺនឹងត្រូវទុក ២ ទៅ ៤ភាគរយ សម្រាប់ក្រសួងវប្បធម៌ និងវិចិត្រសិល្បៈ ដើម្បីបណ្ដុះបណ្ដាលនូវមរតកដូនតា៕