៤ ខែ ​មាន​គ្រោះថ្នាក់​ចរាចរណ៍ ៦២ ករណី កើត​ឡើង​លើ​ផ្លូវ​ល្បឿនលឿនទៅ​ខេត្តព្រះសីហនុ

របាយការណ៍​ក្រសួង​សាធារណការ​និងដឹកជញ្ជូន​បាន​បង្ហាញ​ថា ក្នុង​រយៈពេល ៤ ខែ​ (វិច្ឆិកា ២០២២-កុម្ភៈ ២០២៣) មាន​ករណី​គ្រោះថ្នាក់​ចរាចរណ៍​​ចំនួន ៦២ ករណី​ កើត​ឡើងលើ​​ផ្លូវល្បឿនលឿន​ទៅ​ខេត្តព្រះសីហនុ។

របាយការណ៍ដដែលក៏​បាន​បញ្ជាក់ដែរ​ថា ក្នុង​រយៈពេល ៤ ខែ​ចុងក្រោយ​នេះ មាន​យានយន្តធ្វេីចរាចរណ៍​លេីផ្លូវល្បឿនលឿនចំនួន ១,៤១៣,៩០៦ ដង ខណៈខែកុម្ភៈ ២០២៣ មានចរាចរណ៍ចំនួន​ ៣៥០,៧៨៥ ដង។

ផ្លូវ​ល្បឿនលឿនពីភ្នំពេញ-ខេត្តព្រះសីហនុ បាន​សម្ពោធដាក់​ឱ្យប្រើប្រាស់ជាផ្លូវការនៅខែវិច្ឆិកា ឆ្នាំ២០២២។ មានប្រវែងសរុប ១៨៧.០៥ គីឡូម៉ែត្រ តាម​រយៈ​​​​ផ្លូវល្បឿនលឿន​បាន​ជួយកាត់បន្ថយពេលវេលាធ្វើដំណើរពីរាជធានីភ្នំពេញទៅ​ខេត្ត​ព្រះសីហនុពីចំនួន ៥ ម៉ោងមកត្រឹមតែ ២ ម៉ោងប៉ុណ្ណោះ។

គួរ​បញ្ជាក់ថា ការ​ប្រើប្រាស់​​​​ផ្លូវល្បឿនលឿនទៅ​ខេត្តព្រះសីហនុ ត្រូវ​បាន​កំណត់​ល្បឿន​តាម​ប្រភេទ​យានយន្ត​ក្នុង​នោះ​​​រថយន្តគ្រួសារ/ធុនស្រាល អនុញ្ញាតិ​ឲ្យបើកបរ​ចាប់ពី​ 60-120km/h រថយន្តធុនធ្ងន់មិនមានសណ្តោង​សឺម៉ីរ៉ឺម៉ក ឬម៉ូតូ 500cc/27kW ឡើងទៅ អនុញ្ញាតិ​ឲ្យ​បើកបរ​ពី 60-100km/h និង​រថយន្តសណ្តោងសឺម៉ីរ៉ឺម៉ក ឬ​សណ្តោង​យានដំណើរកំសាន្ត អនុញ្ញាតិ​ឲ្យបើកបរ​ពី 60-80km/h៕