​អង្គការសម្អាតទន្លេសមុទ្រកែច្នៃសំរាមផ្លាស្ទីក​ជាថូផ្កាមានសម្រស់ស្អាត

អង្គការសម្អាត​ទន្លេសមុទ្រ​ដែលជាអង្គការ​ធ្វើការសម្អាតតាមដងទន្លេទាំង ៣ មានទន្លេសាប ទន្លេមេគង្គ និងទន្លេបាសាក់ ដោយប្រើទូកយកមកពីអាល្លឺម៉ង់ ដើម្បីឱ្យទន្លេស្អាត​ និងកុំឱ្យមានសំរាមធ្លាក់តាមច្រាំងទន្លេ។

បច្ចុប្បន្នអង្គការមួយនេះ កំពុងប្រមូលសំរាមយកទៅកែច្នៃប្រើប្រាស់ឡើងវិញដោយបច្ចុប្បន្ន សំរាមប្លាស្ទិកមួយចំនួនដែលសំរាមបានប្រមូលចេញពីទន្លេសាប ទន្លេមេគង្គជិត ៤០០ តោន ត្រូវបាននឹងកំពុងកែច្នៃប្រើប្រាស់ឡើងវិញ និងយកទៅកម្ទេច បំលែងជាថាមពល និងផេះទាំងអស់ក្លាយជាសុីម៉ង់ត៍។

លោក នូ សុវណ្ណ នាយកប្រតិបត្តិអង្គការសម្អាត​ទន្លេសមុទ្រ ប្រាប់កម្ពុជាថ្មីនៅថ្ងៃទី ១០ ខែមីនា ឆ្នាំ ២០២៣ នេះថា «យើងយកសំរាមហ្នឹងទៅកែច្នៃប្រើប្រាស់ឡើងវិញ​ សំរាមដែលប្រមូលមកទាំងអស់មានជិត ៤០០ តោននៅក្នុងឃ្លាំង ហើយឥឡូវនេះ កំពុងយកសំរាមទៅបំបែកញែកវាទៅតាមប្រភេទ ប្រភេទកែច្នៃបានយើងកែច្នៃ ប្រភេទកែច្នៃមិនបាន គឺធ្វើការជាមួយក្រុមហ៊ុនជីបម៉ុង ដោយក្រុមហ៊ុននេះយកប្រភេទសំរាមទាំងនោះទៅរោងចក្រស៊ីម៉ង់ត៍នៅខេត្តកំពត ទៅដុតបំលែងទៅជាភ្លើងអគ្គិសនី និងកម្ទេចផេះក៏យកធ្វើទៅជាស៊ីម៉ង់ត៍»។

លោក នូ សុវណ្ណ បានបញ្ជាក់ថា សម្រាប់ប្រភេទសំរាមដែលកែច្នៃបានដូចជាប្រភេទជ័រ គំរបដប និងជ័រផ្សេងៗដែលមានទីតាំងនៅកោះពេជ្រ អង្គការរបស់លោក​ កំពុងតែធ្វើឱ្យទៅជាសម្ភារប្រើប្រាស់ឡើងវិញបានដូចជាថូផ្កា និងសម្ភារផ្សេងៗជាច្រើនទៀត។

បើតាមលោក នូ សុវណ្ណ អង្គការសម្អាត​ទន្លេសមុទ្រ សហការជាមួយអង្គការ ever wave បានចាប់ផ្ដើមបេសកកម្មនៅថ្ងៃទី ១៨ ខែមីនា ឆ្នាំ ២០២២ ដែលគោលដៅធំរបស់អង្គការសម្អាត​ទន្លេសមុទ្រគឺធ្វើយ៉ាងណាឱ្យទន្លេស្អា គ្មានសំរាម និងចង់ឱ្យបងប្អូនប្រជាពលរដ្ឋយល់ដឹងពីការទុកដាក់សំរាមឱ្យបានត្រឹមត្រូវ ព្រមទាំងចូលរួមជាមួយរាជរដ្ឋាភិបាល ក្នុងការរៀបចំហេដ្ឋារចនាសម្ព័ន្ធក្នុងការទុកដាក់សំរាម៕