អាជ្ញាធរ ហាមអ្នកលក់សាំងដប​ជាប់របងវិទ្យាល័យព្រះយុគន្ធ

អាជីវករ លក់សាំងដប នៅជាប់របងវិទ្យាល័យព្រះយុគន្ធ បានលើកឡើងថា អាជ្ញាធរបានហាម​ពួកគាត់មិនឱ្យ​លក់សាំងដបតទៅទៀតទេ។ ចំពោះការហាមនេះ អាជីវករ​ លើកឡើងថា ពុំដឹងមូលនៅឡើយ។

អាជីវករលក់កាសែត និងលក់សាំងដបជាប់របងវិទ្យាល័យព្រះយុគន្ធ តាមបណ្តោយផ្លូវ១០៥ ដែលសុំមិនបញ្ចេញឈ្មោះ បានឱ្យដឹងថា ក្នុងសប្តាហ៍នេះអាជ្ញាធរ បានចុះមកហាមឃាត់ពួកគាត់មិនឲ្យលក់សាំងដបបន្តទៀតទេ ដោយព្រមានថា បើហ៊ានតែចចេសលក់ នឹងចុះចាប់ភ្លាមៗ។

អាជីវករបានបន្តថា អស់រយៈពេលជាង២០ឆ្នាំមកហើយ ដែលពួកគាត់លក់សាំងដបគួបផ្សំនិងលក់កាសែត និងសម្ភារៈសិក្សាផ្សេងៗ ដើម្បីដោះស្រាយជីវភាពប្រចាំថ្ងៃ។ ប៉ុន្តែក្រោយពីមានការហាមឃាត់មិនឱ្យលក់ ពួកគាត់ ត្អូញត្អែរថា បាត់បង់ចំណូលមួយផ្នែកដែលធ្វើឱ្យជីវភាពខ្វះខាត។

ជុំវិញបញ្ហានេះ កម្ពុជាថ្មី មិនទាន់អាចទាក់ទងសុំការបកស្រាយពីអាជ្ញាធរក្នុងមូលដ្ឋានសង្កាត់បឹងកេងកង២ បាននៅឡើយ៕

អត្ថបទ៖ នរា