សម្ដេចតេជោ អំពាវនាវឲ្យមានការប្រុងប្រយ័ត្នចំពោះជនឆបោកតាមប្រព័ន្ធតេឡេក្រាម

តាមរយៈសារសំឡេងនៅយប់រំលងអាធ្រាត្រថ្ងៃទី ១៣ ខែមីនានេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវឲ្យបងប្អូនជនរួមជាតិមានការប្រុងប្រយ័ត្នខ្ពស់ ខណៈដែលមានជនអណាមិកផ្ញើសារមកសម្ដេចតាមប្រព័ន្ធតេឡេក្រាមឲ្យវេប្រាក់ទៅពួកគេ ដោយតាំងប្រូហ្វាល់ជាអ្នកឧញ៉ា ឃុន សៀ។

សម្ដេចតេជោ បានលើកឡើងថា មានការផ្ញើសារជាភាសារអង់គ្លេសដើម្បីឲ្យសម្ដេចផ្ទេរលុយតាម ABA ឲ្យពួកគេ ដោយប្រើប្រាស់ប្រូហ្វាល់ជាអ្នកឧញ៉ា ឃុន សៀ ប៉ុន្តែលេខទូរស័ព្ទជាលេខរបស់ប្រទេសឡាវ តែបើតាមការស្រាវជ្រាវគឺកំពុងឈរជើងនៅតៃវ៉ាន់។ សម្ដេចតេជោ បញ្ជាក់ថា លេខទូរស័ព្ទដែលផ្ញើសារមកសម្ដេច គឺមានក្បាលកូដ ៨៥៦ ដែលជាលេខរបស់ប្រទេសឡាវ តែបុគ្គល់នោះ​កំពុងឈរជើងនៅប្រទេសតៃវ៉ាន់ឯណោះ ដោយសម្ដេចលើកឡើងថា ទំនងជាពូកគេមិនដឹងថា ជាលេខទូរស័ព្ទរបស់នាយករដ្ឋមន្ត្រី។ សម្ដេច ក៏បានអំពាវនាវឲ្យជនរួមជាតិទាំងអស់មានការប្រុងប្រយ័ត្នខ្ពស់ ដើម្បីជៀសវាងការចាញ់បោករបស់មនុស្សខូច។

សូមបញ្ជាក់ថា មួយរយៈចុងក្រោយនេះតាមប្រព័ន្ធតេឡេក្រាមហាក់មានជនអណាមិកជាច្រើនកំពុងប្រើប្រាស់ប្រូហ្វាល់ក្លែងក្លាយដាក់រូបជាជនជាតិខ្មែរ និងបានផ្ញើសារសួរនាំដើម្បីទាក់ទាញឲ្យចូលវិនិយោគនេះ វិនិយោគនោះ ហើយឲ្យផ្ញើប្រាក់ទៅពួកគេ ហើយក៏បានទាញលេខទូរស័ព្ទរបស់យើងឲ្យចូលក្នុងក្រុមរបស់ពួគគេ ដើម្បីឲ្យឃើញពីភាពជោគជ័យរបស់ពួកគេ ទាំងដែលយើងមិនបានដឹងពីប្រភពច្បាស់លាស់៕

អត្ថបទ៖ សុខុម