ព័ត៌មានជាតិ

នាយកដ្ឋាននគរបាលការពារ ទទួលស្គាល់បញ្ហាមន្ត្រីរបស់ខ្លួនមួយចំនួន និងអះអាងលុបបំបាត់ការសុំពីភ្ញៀវឱ្យបាន

បានផុស

២ years មុន

នៅ

ថ្ងៃចន្ទ ១៣ មីនា ២០២៣

ដោយ

នាយកដ្ឋាននគរបាលការពារ នៃក្រសួងមហាផ្ទៃ នៅថ្ងៃច័ន្ទ ទី១៣ ខែមីនា ឆ្នាំ២០២៣ នេះ បានចេញលិខិតទទួលយកនូវការរិះគន់កែលម្អរបស់បុគ្គលមួយរូប តាមរយៈការផុសផ្សាយដោយរដ្ឋមន្ត្រីក្រសួងព័ត៌មាន នៅលើគេហទំព័រហ្វេសប៊ុក។
ក្នុងលិខិតគោរពជូន នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ នាយកដ្ឋាននគរបាលការពារ បានទទួលស្គាល់លើបញ្ហាមន្ត្រីរបស់ខ្លួន និងអះអាងពង្រឹងលើការគ្រប់គ្រង អប់រំ និងណែនាំមន្ត្រីក្រោមឱវាទ មិនឱ្យមានការសុំកាហ្វេ ឬបារីពីភ្ញៀវ ដែលមានកិច្ចការត្រូវចូលក្រសួង ជាបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីលោក ខៀវ កាញារឹទ្ធ បានផុសផ្សាយសំណូមពររបស់ពលរដ្ឋម្នាក់ ពាក់ព័ន្ធនឹងអ្នកប្រចាំការយាមមាត់ច្រក ចេញ-ចូល សុំកាហ្វេឬបារី ពីពលរដ្ឋ ក្នុងការដោះដូរដើម្បីបានចូលក្រសួង កាលពីពេលថ្មីៗនេះមករួមមក នាយកដ្ឋាននគរបាលការពារ នៅថ្ងៃនេះ ក៏បានចេញលិខិតគោរពជនជាសាធារណៈ ដែលមានខ្លឹមសារបញ្ជាក់ដោយទទួលស្គាល់ថា កន្លងមក ពិតជាមានបញ្ហាដូចការលើកឡើងខាងលើនេះមែន។ ហេតុនេះ នាយកដ្ឋាននគរបាលការពារ ទទួលយកនូវការរិះគន់កែលម្អនេះដោយក្តីរីករាយ និងបានបញ្ជាក់ដែរថា អង្គភាពក៏បានធ្វើការអប់រំ ណែនាំ និងដាក់វិន័យកងកម្លាំងនគរបាលជាតិរួចហើយដែរ។

ក្នុងលិខិតនេះ នាយកដ្ឋាននគរបាលការពារ អះអាងថា នឹងខិតខំអប់រំ ណែនាំ ដល់មន្ត្រីក្រោមឱវាទ ដែលយាមប្រចាំការ ច្រកចេញ-ចូល ទាំងក្រសួងមហាផ្ទៃ ក៏ដូចជាកន្លែងផ្សេងៗទៀត ដោយលុបបំបាត់ឱ្យបាននូវការសុំ កាហ្វេ ឬបារីពីភ្ញៀវ ដែលមានកិច្ចការត្រូវចូលក្រសួង។

គួររំលឹកថា ថ្មីៗនេះ លោក ខៀវ កាញារឹទ្ធ រដ្ឋមន្ត្រីក្រសួងព័ត៌មាន បានផុសផ្សាយអត្ថបទមួយ នៅលើគេហទំព័រហ្វេសប៊ុករបស់លោក ដែលមានខ្លឹមសារថា “អរុណសួស្តី លោកពូជាទីគោរពរបស់ក្មួយ ក្មួយសង្ឃឹមថាថ្ងៃណាមួយ លោកពូនឹងបានឃេីញសារមួយនេះ ពេលលោកពូចូលរួមប្រជុំជួបក្រសួងធំៗ លោកពូជួយលេីកមតិកែលម្អ មាត់ច្រកចេញចូលក្រសួង កុំឲ្យបងៗពូៗអ្នកប្រចាំការយាមមាត់ច្រកចេញចូល សុំកាហ្វេ បារី ប្រជាជនដោះដូរនឹងការចូលក្រសួង ដេីម្បីបានដាក់ពាក្យបណ្តឹងនានាអី ប្រជាជនកំពុងមានទុក្ខរត់រករដ្ឋជួយ ប៉ុន្តែបែរជាអ្នកប្រចាំការមាត់ច្រកស្តីឲ្យបន្ថែមទៀតរឿងសុំកាហ្វេមិនបាន (ទោះប្រជាជនខំតំកល់អត្តសញ្ញាណប័ណ្ណអោយតាមច្បាប់រដ្ឋកំណត់ដេីម្បីបានចូលហេីយនៅគាត់មិនសុខចិត្តស្តីបន្ទោសឲ្យហេតុផលមិនសមរម្យ) ក្មួយមិនស្តាយ ១ម៉ឺនរៀល-២ម៉ឺនរៀលទេ តែក៍មិនឲ្យដាច់ខាតព្រោះជាទម្លាប់មិនល្អតកូនតចៅ បេីលោកពូបានឃេីញសារនេះ សូមលោកពូជួយផុសអំពីច្បាប់ចេញចូលគ្រប់ក្រសួងដេីម្បីឲ្យប្រជាជនយល់ដឹង និងក្លាហានបានចេញចូលទៅដាក់ពាក្យបណ្តឹងរឿងតូចរឿងធំស្រួល ព្រោះមិនត្រូវចំណាយអស់ប្រាក់បន្ថែមលេីសេវាផ្សេងៗទៀត (ជូបផ្ទាល់ល្ងាចម្សិលមិញក្រសួងមហាផ្ទៃ) កន្លែងដែលចាប់ជប់ខិលខូច ប៉ុន្តែបែរជាជូបរឿងបែបនេះ
សូមលោកពូអនុគ្រោះប្រសិនបេីក្មួយនិយាយខុសដោយប្រការណាមួយ ជូនពលោកពូសុភាពល្អ
Mei Ei” ៕