ក្រសួងទទូចឱ្យអ្នកធ្វើដំណើរលើផ្លូវល្បឿនលឿន កុំបើកលើសកំណត់ និងត្រួតពិនិត្យយានយន្តឱ្យបានត្រឹមត្រូវ

ក្រសួងសាធារណការ និងដឹកជញ្ជូន អំពាវនាវឲ្យអ្នកធ្វើដំណើរលើផ្លូវល្បឿនលឿនភ្នំពេញ-ព្រះសីហនុ បើកបរកុំឲ្យ​លើស​ល្បឿនកំណត់ និងត្រូវត្រួតពិនិត្យលក្ខណៈបច្ចេកទេសយានយន្តឱ្យបានត្រឹមត្រូវ​មុននឹងធ្វើដំណើរ ដើម្បីចៀសវាងគ្រោះថ្នាក់ជាយថាហេតុផ្សេងៗ។

ការទទូចសុំនេះ គឺបន្ទាប់ពីសង្កេតឃើញមានយានយន្តមួយចំនួនតូច នៅមិនគោរពច្បាប់ចរាចរណ៍ បើកបរលើសល្បឿន កំណត់ ការប្រើប្រាស់គន្លងផ្លូវមិនបានត្រឹមត្រូវ បើកបរបញ្ច្រាសទិស ហើយមានខ្លះនៅមិនទាន់យល់ពីការត្រួតពិនិត្យ​បឋម និង​មិនបាន​ត្រួតពិនិត្យ​លក្ខណៈបច្ចេកទេស​ទៀងទាត់ជាដើម ដែលអាចនាំ​ឲ្យ​មានគ្រោះថ្នាក់​ជា​យថាហេតុ​ផ្សេងៗ ដូចករណីមួយចំនួន កាលពី​ពេលកន្លង​មក។

ម៉្យាងវិញទៀត ក៏មានករណីរបូតកង់ និងឆេះរថយន្តប៉ុន្មានករណីផងដែរ ដែលបណ្តាលមកពីបញ្ហាបច្ចេកទេសរថយន្ត ហេតុនេះ ក្រសួងសាធារណការ និងដឹកជញ្ជូន ក៏ដូចជាក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ អំពាវនាវ និងក្រើនរម្លឹកដល់បងប្អូនប្រជាពលរដ្ឋ ត្រូវតាគោរពច្បាប់ចរាចរណ៍ ដោយអនុវត្តតាមគោលការណ៍សុវត្តិភាព។
លើសពីនេះ ត្រូវត្រួតពិនិត្យាយាន្តយន្តរបស់ខ្លួនជានិច្ច មុនពេលចេញដំណើរ ពិសេសគឺត្រូវត្រួតពិនិត្យ​លក្ខណៈ​បច្ចេកទេស ឲ្យបាន​ទៀងទាត់​​តាម​ការកំណត់ ដើម្បីជៀសវាងករណីដូចដែលមានកាលពីពេលកន្លងមក។

គួរបញ្ជាក់ថា ក្នុងរយៈពេល ៤ខែ​ចុងក្រោយនេះ ពោលគឺចាប់ពី ខែវិច្ឆិកា ២០២២-ខែកុម្ភៈ ២០២៣ ផ្លូវល្បឿនលឿន​ភ្នំពេញ-ក្រុងព្រះសីហនុ មានយានយន្តធ្វេីចរាចរណ៍សរុបប្រមាណ ១,៤លានដង៕