ព័ត៌មានជាតិ

រោងចក្រធ្យូងថ្មខេត្តឧត្តរមានជ័យសម្រេច ១០០ ភាគរយ អាចផ្គត់ផ្គង់ថាមពលដល់ខេត្តសៀមរាប

បានផុស

២ years មុន

នៅ

ថ្ងៃអង្គារ ២១ មីនា ២០២៣

ដោយ

រោងចក្រថាមពលអគ្គិសនីដំណើរការដោយធ្យូងថ្មក្នុងខេត្តឧត្តរមានជ័យ ក្រៅពីអាចផ្គត់ផ្គង់តម្រូវការប្រើប្រាស់នៅក្នុងខេត្ត ក៏បានជួយផ្គត់ផ្គង់ដល់ខេត្តសៀមរាបផងដែរ។

លោក ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យបានលើកឡើងនៅក្នុងសន្និសីទនៅព្រឹកនេះថា ខេត្តឧត្តរមានជ័យមានរោងចក្រអគ្គិសនីដំណើរការដោយធ្យូងថ្មមួយកន្លែងស្ថិតក្នុងស្រុកត្រពាំងប្រាសាទ។ រោងចក្រអគ្គិសនីដុតដោយធ្យូងថ្មនេះមានអនុភាព ២៦៥ មេហ្គាវ៉ាត់ ក្រៅពីអាចបំពេញតម្រូវការប្រើប្រាស់ថាមពលក្នុងខេត្ត ក៏បានជួយផ្គត់ផ្គង់ដល់ខេត្តសៀមរាប ដោយបច្ចុប្បន្នអាជ្ញាធរកំពុងសាងសង់ខ្សែបញ្ជូនអគ្គិសនីពីខេត្តឧត្តរមានជ័យទៅកាន់អនុស្ថានីយដែលគ្រោងដំណើរការក្នុងពេលដ៏ឆាប់ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោម ៣០៨ ភូមិក្នុងខេត្តឧត្តរមានជ័យ នៅសល់ភូមិចំនួន ៣២ ភូមិ ដែលមិនទាន់មានបណ្តាញអគ្គិសនីប្រើប្រាស់។ ទាក់ទងភូមិដែលនៅសេសសល់ បើតាមលោក ប៉ែន កុសល្យ អភិបាលខេត្តឧត្តរមានជ័យ អាជ្ញាធរខេត្តបានដាក់គោលដៅសម្រេចឲ្យបានគ្រប់ភូមិត្រូវមានអគ្គិសនីប្រើប្រាស់ទាំងអស់ក្នុងអំឡុងខែមិថុនាខាងមុខ ដោយបច្ចុប្បន្នក្រុមការងារកំពុងធ្វើការពង្រីកការតភ្ជាប់បណ្តាញអគ្គិសនីបន្ថែមទៀតដល់គ្រប់មូលដ្ឋានភូមិឃុំ ជាពិសេសនៅតាមតំបន់ជនបទដាច់ស្រយាល៕