ព័ត៌មានជាតិ

គ្រោងប្រែក្លាយព្រៃសហគមន៍សង្ឃរុក្ខវ័ន្ត ទៅជាតំបន់អេកូទេសចរណ៍ធម្មជាតិ

បានផុស

២ years មុន

នៅ

ថ្ងៃអង្គារ ២១ មីនា ២០២៣

ដោយ

ក្នុងសន្និសីទសារព័ត៌មានស្តីពី «ភាពជោគជ័យរយៈពេល ៥ ឆ្នាំរបស់រដ្ឋបាលខេត្តឧត្តរមានជ័យ» នៅព្រឹកថ្ងៃទី២១ ខែមីនា នេះ លោក ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យបានលើកឡើងថា បច្ចុប្បន្ននេះរដ្ឋបាលខេត្តបានកំពុងសិក្សាបន្ថែម លើគម្រោងប្រែក្លាយព្រៃសហគមន៍សង្ឃរុក្ខវ័ន្ត ដែលស្ថិតនៅចម្ងាយ ៤០គីឡូម៉ែត្រភាគឦសាន នៃក្រុងសំរោងខេត្តឧត្តរមានជ័យទៅជាតំបន់អេកូរទេសចរណ៍ធម្មជាតិនាពេលឆាប់ៗខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ែន កុសល្យ បានមានប្រសាសន៍ថា នៅខេត្តឧត្តរមានជ័យមានព្រៃសហគមន៍ជាច្រើន ក្នុងនោះក៏មានព្រៃសហគមន៍រុក្ខវ័ន្តមួយកន្លែង ដែលបានគ្រប់ដណ្ដប់លើផ្ទៃដីប្រមាណជិត ៣ម៉ឺនហិតា។ ព្រៃសហគមន៍រុក្ខវ័ន្តគឺសម្បូរទៅដោយដើមឈើតូចធំជាច្រើនប្រភេទ និងទីជម្រកសត្វព្រៃស្ទើរគ្រប់ប្រភេទ ក៏ដូចជាសំណង់សាទនានាផងដែរ។

លោក ប៉ែន កុសល្យ បានបញ្ជាក់ថា បានជាលោកគិតគូរប្រែក្លាយព្រៃសហគមន៍សង្ឃរូបវន្តទៅជាតំបន់អេកូរទេសចរណ៍ធម្មជាតិ ដោយសារទីនោះសម្បូរដោយសម្បត្តិធម្មជាតិជាច្រើន ជម្រកនៃសត្វព្រៃ គួបផ្សំពេលបច្ចុប្បន្ននេះ មិនថាតែទេសចរអឺរ៉ុប ក៏ដូចជាទេសចរកម្ពុជាមួយចំនួន ពិសេសយុវវ័យច្រើននិយមចូលចិត្តការដើរលេង បោះតង់ជាដើម។ ដូច្នេះ លោកក៏រំពឹងថា ភ្ញៀវទេសចរជាច្រើន ដែលបានមកទស្សនាខេត្តសៀមរាប អាចនឹងហៀរមកដល់ខេត្តឧត្តរមានជ័យ ដើម្បីមកទស្សនាតំបន់អេកូរទេសចរណ៍ធម្មជាតិ។

លោកអភិបាលខេត្តមានប្រសាសន៍ថា ដោយបានមើលឃើញពីសម្បត្តិធម្មជាតិដ៏មានតម្លៃលើការជំរុញសេដ្ឋកិច្ច អាជ្ញាធរខេត្តកំពុងសិក្សាស្វែងយល់ ក៏ដូចជាពិភាក្សាជាមួយក្រសួងបរិស្ថានស្វែងរកដៃគូរអភិវឌ្ឍន៍ឍនៅតំបន់អេកូរទេសចរណ៍ធម្មជាតិ ដើម្បីអាចជួយលើកមុខមាត់ខេត្តក៏ដូចទាក់ទាញភ្ញៀវទេសចរទាំងជាតិនិងអន្តរជាតិ ឱ្យចូលមកលេងកម្សាន្តនៅខេត្តឧត្តរមានជ័យកាន់តែច្រើនបន្ថែមទៀត៕