មន្ទីរកសិកម្មខេត្តស្ទឹងត្រែង នឹងដាក់បញ្ចូលឈើ​ហូបផ្លែ ម៉ាក់ប្រាង ជាផលិតផលមួយភូមិមួយ

មន្ទីរកសិកម្មរុក្ខាប្រមាញ់និងនេសាទខេត្តស្ទឹងត្រែង ជំរុញឲ្យកសិករឱ្យដាំដំណាំឈើហូបផ្លែឱ្យបានច្រើនមុខ ដើម្បីគណៈកម្មាធិការតម្រង់ទិសនៃគម្រោងបន្លែផ្លែឈើកម្ពុជា វាយតម្លៃដាក់បញ្ចូលជាផលិតផលមួយភូមិមួយ និងបាននាំចេញទៅទីផ្សារលក់បានប្រាក់ចំណូលប្រចាំគ្រួសារ។        

លោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់និងនេសាទខេត្តបានបញ្ចាក់ថា កសិករនៅភូមិរាជានុកូល សង្កាត់ក្រុងស្ទឹងត្រែង ដាំដំណាំឈឺហូបផ្លែ​លោក​នឹងឱ្យមន្ត្រីជំនាញមកបង្ហាញពីបច្ចេកទេសថែទាំដាំណាំឈើហូបផ្លែមួយនេះបន្ថែម ដើម្បីឱ្យទទួលបានទិន្នផលកាន់តែល្អ ហើយរៀបចំដាក់បញ្ចូលទៅជាផលិតផលមួយភូមិមួយទៅតាមរដូវកាល។

លោកបន្តថា ផ្លែឈើមួយមុខនេះមានទីផ្សារល្អ ព្រោះមានរស់ជាតិឆ្ងាញ់ប្លែកពីផ្លែឈើផ្សេងៗទៀត ហើយនៅក្នុងខេត្តក៏ត្រូវការបញ្ជាទិញច្រើន មួយចំណែកទៀតបាននាំចេញទៅទីផ្សារនានានៅតាមបណ្តាខេត្ត ជាពិសេសទៅរាជធានីភ្នំពេញ ហើយសម្រាប់មន្ទីរកសិកម្មក៏បានលើកទឹកចិត្តដល់ប្រជាពលរដ្ឋដើម្បីធ្វើការដាំដុះក៏ដូចជាផលិតទៅដល់ផលិតផលកសិកកម្មផ្សេងៗទៀត មិនត្រឹមតែម៉ាក់ប្រាងទេ  សូម្បីតែផ្លែឈើផ្សេងៗទៀត យើងនៅតែជំរុញលើកទឹកចិត្ត និងចូលរួមសហការគ្រប់រូមភាពដែលយើងអាចធ្វើទៅបាន។

លោកស្រី ចាន់ សុខុម កសិករនៅភូមិរាជានុកូល សង្កាត់ក្រុងស្ទឹងត្រែង បានគាំទ្រចំពោះគោលបំណងនេះ ព្រោះកសិករពេលដាំដុះដំណាំបានផលល្អជាចំណែកមួយបានជួយលើកកម្ពស់ផ្នែកជីវភាពរស់នៅ   និងបានរួមគ្នាកាត់បន្ថយការធ្វើចំណាកស្រុកទៅស៊ីឈ្នួលលក់កម្លាំងពលកម្មផងដែរ។

លោកស្រីថា ដើមម៉ាក់ប្រាំងដើមធំផ្តល់ផលចាប់ពី៥០០ទៅ៦០០គីឡូក្រាមចំពោះដើមតូចបានផលប្រមាណ៣០០​គីឡូ​ក្រាម​ក្នុងមួយដើម ហើយផ្លែវាអតិថិជននិយមទិញទៅបរិភោគ ព្រោះជាផ្លែឈើធម្មជាតិ  ក្នុងមួយឆ្នាំមានតែម្តង និងមានរស់ជាតិឆ្ងាញ់ទៀតផង។

សូមបញ្ជាក់ថា ម៉ាក់ប្រាងជាឈើហូបផ្លែមួយមុខមានឈ្មោះនៅក្នុងបញ្ជីកសិកម្មតាំងពីដើមតរៀងមក ហើយកាលពីសម័យ​ដើមច្រើនព្រះសង្ឃដាំនៅក្នុងទីអារាមមានម៉ាក់ប្រេង ម៉ាក់ប្រាង បច្ចុប្បន្នកសិករដាំដុះ បានផលច្រើនធ្វើអាជីវកម្មជាលក្ខណៈគ្រួសារ និងបាននាំចេញទៅលក់នៅទីផ្សារ ក្នុងតម្លៃ៨.០០០រៀលក្នុងមួយគីឡូក្រាម ហើយនៅឆ្នាំ២០២៣​នេះមានបរិមាណច្រើនជាងរាល់ឆ្នាំ៕

អត្ថបទ៖ ងិនលីម