ព័ត៌មានជាតិ

ក្រសួងជំរុញក្រុមហ៊ុនទូរសព្ទ បង្កើនទំហំទិន្នន័យអីនធឺណិតឲ្យច្រើនជាងមុនលើគម្រោងប្តូរលុយ

បានផុស

២ years មុន

នៅ

ថ្ងៃព្រហស្បតិ៍ ២៣ មីនា ២០២៣

ដោយ

ក្រសួងប្រៃសណីយ៍និងទូរគមនាគមន៍ (ក.ប.ទ.) បានជំរុញក្រុមហ៊ុនផ្តល់សេវាទូរសព្ទឲ្យបង្កើនទំហំទិន្នន័យអ៊ីនធឺណិតនៅក្នុងគម្រោងប្ដូរលុយរបស់ខ្លួន។

ក្នុងសេចក្តីជូនដំណឹងរបស់ក្រសួងបានបញ្ជាក់ថា ក្រសួងប្រៃសណីយ៍និងទូរគមនាគមន៍ (ក.ប.ទ.) បានសង្កេតឃើញមានប្រតិកម្មពីអ្នកប្រើប្រាស់សេវាទូរសព្ទតាមបណ្តាញសង្គម ពាក់ព័ន្ធគម្រោងប្តូរលុយ ដោយលើកឡើងថា “គម្រោងកាត់លុយច្រើនជាងមុន ឬប្តូរលុយហើយប្រើអ៊ីនធឺណិតមិនគ្រប់គ្រាន់ ឬក្រសួងមិនបានដោះស្រាយបញ្ហារបស់អ្នកប្រើប្រាស់” ជាដើម។

ក្រសួងប្រៃសណីយ៍និងទូរគមនាគមន៍បានពន្យល់ដល់សាធារណជនថា កន្លងមកប្រតិបត្តិករទូរសព្ទចល័តបានផ្តល់សេវាក្រោមរូបភាពជាគម្រោងប្តូរលុយ (ឧទាហរណ៍ ១ ដុល្លារអាម៉េរិក ប្ដូរបានរាប់រយឬរាប់ពាន់ដុល្លារអាម៉េរិក) សម្រាប់ប្រើទាំងសេវាហៅចេញ សារខ្លី SMS និងសេវាអ៊ីនធឺណិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងប្តូរលុយនេះ បានបង្កឱ្យមានភាពមិនច្បាស់លាស់និងមិនមានតម្លាភាព ពីព្រោះអ្នកប្រើប្រាស់មិនអាចកត់ត្រា និងតាមដានទិន្នន័យដែលខ្លួនបានប្រើ។ ដើម្បីចូលរួមចំណែកក្នុងការការពារអ្នកប្រើប្រាស់ ក្រសួងបានជួបពិភាក្សាជាមួយប្រតិបត្តិករទូរសព្ទចល័តទាំងអស់ ដើម្បីកែសម្រួលទៅជាគម្រោងប្ដូរលុយដែលមានតម្លាភាពពេញលេញ និងច្បាស់លាស់ ដោយមើលឃើញចំនួននាទីសម្រាប់ហៅចេញនិងចំនួនសារខ្លី SMS សម្រាប់ផ្ញើចេញក្នុងប្រព័ន្ធនិងទំហំទិន្នន័យអ៊ីនធឺណិតទៅតាមទឹកប្រាក់ ដែលអ្នកប្រើប្រាស់បានជាវសេវាស្របតាមការអនុវត្តជាសកល។

យោងតាមទិន្នន័យឆ្នាំ២០១៨ ប្រជាជនកម្ពុជាម្នាក់ប្រើទិន្នន័យអ៊ីនធឺណិតតាមសេវាទូរសព្ទចល័តជាមធ្យម ១០ ជីហ្គាបៃ (Gigabytes) ក្នុង ១ ខែ ក៏ប៉ុន្តែបច្ចុប្បន្ន ការប្រើបានកើនឡើងលើស ២០ ជីហ្គាបៃ ក្នុង ១ ខែ។ ដោយសារកំណើននៃការប្រើកម្មវិធីថ្មីៗនៅក្នុងទូរសព្ទ/ឧបករណ៍ឆ្លាត (Smart Phone/Device) នៅពេលដែលថ្លៃសេវាគឺនៅរក្សាដដែល ចន្លោះពី ៣ ទៅ ៥ ដុល្លារអាម៉េរិក ហើយអ្នកប្រើប្រាស់ភាគច្រើនបានប្រើសម្រាប់សេវាកំសាន្តនិងបណ្ដាញសង្គម ដូចជា ហ្វេសប៊ុក (Facebook) តិកតុក (TikTok) យូធូប (YouTube) ជាអាទិ៍ ដែលត្រូវការប្រើទំហំទិន្នន័យអ៊ីនធឺណិតធំ។

តាមការសិក្សានៅប្រទេសសិង្ហបុរី ថៃ វៀតណាម ម៉ាឡេស៊ី ជាដើម ប្រជាជនម្នាក់ប្រើទិន្នន័យអ៊ីនធឺណិត តាមទូរសព្ទចល័តជាមធ្យម ក្រោម ១០ ជីហ្គាបៃ ក្នុងថ្លៃសេវាចន្លោះពី ៧ ទៅ ១០ ដុល្លារអាម៉េរិក ក្នុង ១ ខែ។ ដោយអ្នកប្រើប្រាស់នៅប្រទេសទាំងនេះ ពឹងផ្អែកជាចម្បងលើការប្រើសេវាអ៊ីនធឺណិតអចល័ត ភ្ជាប់តាមបណ្តាញខ្សែកាប អុបទិកដល់គេហដ្ឋាន FTTH (Fiber To The Home) វិញ ហើយដែលសព្វថ្ងៃនេះ ក្រសួងកំពុងជំរុញការតភ្ជាប់បណ្តាញខ្សែកាបអុបទិកឱ្យទៅដល់គ្រប់ឃុំ-សង្កាត់ ត្រឹមឆ្នាំ២០២៧។ នេះបង្ហាញឱ្យឃើញថា ថ្លៃសេវាទូរសព្ទនិងអ៊ីនធឺណិតចល័តនៅកម្ពុជា មានថ្លៃទាបនៅឡើយបើធៀបនឹងបណ្ដាប្រទេសក្នុងតំបន់។

តាមការសិក្សារបស់ក្រុមហ៊ុន EXISTENT របស់ចក្រភពអង់គ្លេស ថ្លៃសេវាទូរសព្ទនិងអីនធឺណិតចល័តនៅកម្ពុជាបច្ចុប្បន្ន ស្ថិតនៅលំដាប់ទី ៤ ទាបជាងគេលើពិភពលោក ក៏ប៉ុន្តែតម្រូវការនៃការប្រើគឺខ្ពស់ជាង ២ ដង។

ចំពោះបញ្ហាដែលបានលើកឡើងក្នុងបណ្តាញសង្គមនាពេលថ្មីៗនេះវិញ ក្រសួងបានទាក់ទងទៅអ្នកប្រើប្រាស់មួយចំនួន ដែលបានលើកឡើងតាមបណ្តាញសង្គម ដើម្បីធ្វើការសាកសួរព័ត៌មាន និងបានអញ្ជើញឱ្យមក ដាក់ពាក្យបណ្តឹងលើប្រតិបត្តិករទូរសព្ទចល័តដែលខ្លួនកំពុងប្រើ ក្នុងករណីមានវិវាទពិតប្រាកដមែន។ ប៉ុន្តែអ្នកប្រើប្រាស់ដែលបានលើកឡើងនោះមិនមានព័ត៌មានច្បាស់លាស់ឡើយ ដោយមួយចំនួនឆ្លើយថាឮពីអ្នកដទៃ។ ចំណែកមួយចំនួនទៀតបានទទួលស្គាល់ថា ខ្លួនបានប្រើសេវាអ៊ីនធឺណិតតាមទូរសព្ទចល័តច្រើនលើសលុបសម្រាប់មើលកម្មវិធីកំសាន្ត ហើយមួយចំនួននោះបានប្រាប់ថា ខ្លួនប្រើសម្រាប់ការងារនិងអាជីវកម្មប្រចាំថ្ងៃ ដោយពុំបានប្រើអ៊ីនធឺណិតអចល័តតភ្ជាប់ទៅគេហដ្ឋាន ឬ Wi-Fi។

មូលហេតុទាំងនេះគឺជាកត្តាចម្បងក្នុងចំណោមកត្តាជាច្រើនដែលបណ្ដាលឱ្យសេវាអ៊ីនធឺណិតចល័ត ប្រើមិនគ្រប់គ្រាន់តាមគម្រោងដែលបានភ្ជាប់។

ដើម្បីការពារអត្ថប្រយោជន៍របស់អ្នកប្រើប្រាស់ និងដោយសង្កេតឃើញថា និន្នាការនៃការប្រើសេវាទូរសព្ទនិងអ៊ីនធឺណិតចល័តមានការកើនឡើងខ្ពស់ ក្រសួងបានស្នើដល់ប្រតិបត្តិករទូរសព្ទចល័តទាំងអស់ពិនិត្យលទ្ធភាពក្នុងការបង្កើតជាគម្រោងថ្មីៗ ដែលបានបង្កើនទំហំទិន្នន័យអីនធឺណិតច្រើនជាមុន។ បន្ថែមលើនេះទៀត ក៏បានស្នើឱ្យប្រតិបត្តិករទូរសព្ទចល័តទាំងអស់ រៀបចំការផ្សព្វផ្សាយអំពីកញ្ចប់គម្រោងសេវាកម្មថ្មីៗនេះឱ្យបានទូលំទូលាយ និងពន្យល់ដល់អ្នកប្រើប្រាស់ឱ្យបានច្បាស់លាស់ ជាពិសេសអំពីប្រភេទមាតិកាដែលត្រូវការប្រើទំហំទិន្នន័យអ៊ីនធឺណិតធំ។

ក្រសួងអះអាងថា នៅតែងតែគិតពីផលប្រយោជន៍របស់អ្នកប្រើប្រាស់ ក៏ដូចជាជំរុញការអភិវឌ្ឍវិស័យទូរគមនាគមន៍។ ក្នុងករណីអ្នកប្រើប្រាស់ជួបប្រទះបញ្ហាណាមួយជាយថាហេតុ អាចទាក់ទងមកកាន់និយ័តករទូរគមនាគមន៍កម្ពុជាតាមលេខទូរសព្ទ Hotline ៦៧៨៩។

Related Topics:ក្រសួងប្រៃសណីយ៍ និងទូរគមនាគមន៍Featured