លោកបណ្ឌិត​ លី ឆេង៖ការចែករំលែកបទពិសោធន៍របស់សិស្សនិទ្ទេសA ជាទុនដើម្បីអភិវឌ្ឈន៍ចំណេះ

នៅថ្ងៃទី២៣ ខែមីនានេះ លោកបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ និងជាអគ្គនាយក ប៊ែលធី គ្រុប បានអះអាងថា ការចែករំលែកបទពិសោធន៍របស់សិស្សនិទ្ទេសA ដល់សិស្សប្អូនជំនាន់ក្រោយនឹងក្លាយជាទុនសម្រាប់ការត្រៀមប្រឡងសញ្ញាបត្រមធ្យមសិក្សាទុតិយភូមិ។ លោកបណ្ឌិត​ លី ឆេង ថ្លែងបែបនេះក្នុងពិធីសំណេះសំណាល និងចែក រំលែកបទពិសោធន៍របស់សិស្សប៊ែលធីនិទ្ទេសA ចំនួន ៦៧រូបជូនដល់សិស្សថ្នា​ក់ទី១២ ដែលត្រូវប្រឡងសញ្ញាបត្រមធ្យមសិក្សាទុតិយភូមិ។

ក្នុងឱកាសនោះ លោកបណ្ឌិត លី ឆេង បានថ្លែងការកោតសរសើរចំពោះសិស្សនិទ្ទេសA ទាំង៦៧រូប និងសិស្សជ័យលាភីទាំងអស់ដែលបានយកចិត្តទុកដាក់ខិតខំសិក្សារៀនសូត្រ ​ស្តាប់គ្រូពន្យល់ គោរពបទបញ្ជាផ្ទៃក្នុង មានវិន័យ សីលធម៌ និងគុណធម៌ល្អ ជាពិសេសមិនបង្កផលលំបាកដល់គ្រួសារ និងសង្គមជាតិ រហូតទទួលបានជោគជ័យនាពេលនេះ។ លោកបណ្ឌិត​ ក៏បានថ្លែងអំណរគុណចំពោះសិស្សនិទ្ទេសA ដែលបានចែករំលែកបទពិសោធន៍ជោគជ័យរបស់ខ្លួនដល់សិស្សប្អូនជំនាន់ក្រោយ ដើម្បីជាទុនសម្រាប់ត្រៀមប្រឡងសញ្ញាបត្រមធ្យមសិក្សាទុតិយភូមិនាខាងមុននេះ។

បើតាមការចែករំលែកបទពិសោធន៍ជោគជ័យក្នុងការសិក្សារបស់សិស្សនិទ្ទេសA ចំនួន ៥រូបក្នុងចំណោមសិស្សនិទ្ទេសA ទាំង ៦៧រូប គឺមានកត្តារួមផ្សំសំខាន់ៗចំនួន៤ គឺទី១) កត្តាខ្លួនឯង គឺត្រូវខិតខំសិក្សារៀនសូត្រ និងមានគោលដៅច្បាស់លាស់។ ទី២) កត្តាគ្រួសារ គឺមាតាបិតាផ្តល់ឱកាសសិក្សា និងជំរុញលើកទឹកចិត្តបុត្រធីតា។ ទី៣) កត្តាសាលា ត្រូវមានកម្មវិធីសិក្សាល្អៗ កម្មវិធីសិក្សាបន្ថែម គ្រូមានសមត្ថភាព បទពិសោធន៍ និងគរុកោសល្យ ព្រមទាំងស្មារតីក្នុងការសិក្សា។ ទី៤) កត្តាសង្គម ដែលជាកត្តាដ៏សំខាន់ ដោយសារប្រទេសជាតិមានសុខសន្តិភាពពេញលេញ ស្ថិរភាព និងការអភិវឌ្ឍ លើគ្រប់វិស័យ នឹងធ្វើឲ្យសិស្សមានឱកាសបានរៀនសូត្រ។

គួរសម្រាបដែរថា បើតាមលោក ប៊ុត ឌីម៉ង់ ប្រធានការិយាល័យចំណេះទូទៅនៃសាលា ប៊ែលធី អន្តរជាតិ បានឲ្យដឹងថា បច្ចុប្បន្ន សាលា ប៊ែលធី អន្តរជាតិ មាន ២៦សាខា ក្នុងនោះ ២៤សាខាកំពុងដំណើរការ និង២សាខាកំពុងសាងសង់។  គិតត្រឹមឆ្នាំសិក្សា២០២១–២០២២ សាលា ប៊ែលធី អន្តរជាតិ មានសិស្សថ្នាក់ទី​១២ ដែលបានប្រឡងបញ្ចប់សញ្ញាបត្រមធ្យមសិក្សាទុតិយភូមិ (បាក់ឌុប) ចំនួន១៧ ១០០នាក់ ក្នុងនោះ ប្រឡងជាប់ចំនួន ១៤ ៣៩៨នាក់ ស្មើនឹង ៨៤.២០% និងទទួលបានសិស្សនិទ្ទេស​​A ចំនួន ២៧៨នាក់ មានសិស្សពូកែទូទាំងរាជធានី ចំនួន ៩០នាក់ និងទូទាំងប្រទេសចំនួន ២០នាក់៕