សម្ដេចតេជោ ហ៊ុន សែន ៖ កម្ពុជា មិនខ្វះអង្ករសម្រាប់ទទួលទាននោះទេ ទោះបីជាពិភពលោកប្រែប្រួលយ៉ាងណាក៏ដោយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា ប្រទេសកម្ពុជា មិនខ្វះអង្ករសម្រាប់ទទួលទាននោះទេ ទោះបីជាពិភពលោកប្រែប្រួលយ៉ាងណាក៏ដោយ។ ការគូសបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីបិទសន្និបាតបូក​សរុប​​​ការងារឆ្នាំចាស់ និងលើកទិសដៅការងារឆ្នាំថ្មីរបស់ក្រសួងកសិកម្ម រុក្ខាប្រមាញ់ និងនេសាទ នៅល្ងាចថ្ងៃទី ២៤ ខែមីនា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា កន្លងមកកម្ពុជា ធ្លាប់ខ្វះអង្ករទទួលទាន តែពេលនេះមិនមានការខ្វះខាតដូចពីពេលមុនឡើយ។ សម្ដេចតេជោ ហ៊ុន សែន ថ្លែងបែបនេះថា «បើទោះបីជាពិភពលោកប្រែប្រួលយ៉ាងណាក៏ដោយ តែកម្ពុជាមិនខ្វះអង្ករស៊ីទេ មិនខ្វះអង្ករ រឿងនេះគឺជារឿងច្បាស់លាស់របស់យើង ដែលមុននេះយើងធ្លាប់ខ្វះអង្ករ តែពេលយើងមិនអាចខ្វះអង្ករ និយាយថា មិនអាចខ្វះស្បៀង»៕